Një nga klubet që ka kërkuar në javët e fundit, ndihmën e shtetit për të evituar falimentin duket se do të mbijetojë, duke marrë fondet e mjaftueshme për të vazhduar aktivitetet sportive të saj
Ndizen shpresat për skuadrën që sezonin e shkuar militoi në Kategorinë e Parë, Orikun. Entiteti i qytezës turistike nuk do të shkrihet, pasi Bashkia e Vlorës ka marrë përsipër që të ndihmojë klubin financiarisht. Media sportive shqiptare “Panorama Sport” zbulon se për klubin është planifikuar që të lëvrohet një fond në formën e subvencioni.
Do të jetë një shumë prej 5.000.000 lekë, që do t’i shërbejë për periudhën shtator-dhjetor, me klubin që në fakt kërkonte më shumë duke parë vështirësitë që po kalon.
Megjithatë, vendimmarrja pritet që të merret në mbledhjen e sotme të Këshillit Bashkiak. Nëse fondi miratohet, do t’i hapet rrugë edhe ngritjes së skuadrës që këtë sezon do të militojë në Kategorinë e Dytë. Kujtojmë që orikasit janë totalisht në ajër dhe as që e kanë nisur stërvitjen.
Discussion about this post