Komuniteti Mysliman i Shqipërisë thotë se pr/ligji për gjininë gjithëpërfshirëse nuk përputhet me vlerat themelore të familjes, por përkundrazi, “mund të cenojnë seriozisht të ardhmen e saj”
Në një reagim, Komuniteti Mysliman i Shqipërisë nënvizon se e “sheh me shqetësim përfshirjen e termit “gjithëpërfshirës” në përkufizimin e gjinisë”.
“Përpjekje për të shtuar apo shpikur identitete të tjera gjinore përbën një devijim nga e vërteta e krijimit.. Ky ndryshim përbën një largim nga kuptimi fetar islam dhe nga kuptimi natyror dhe i qartë i gjinisë, si burrë dhe grua, i cili ka qenë gjithmonë baza mbi të cilën është ndërtuar shoqëria njerëzore.
Përfshirja e një nocioni të paqartë, që nuk jep kufij të qartë dhe hap rrugë për interpretime të shumta, rrezikon të sjellë konfuzion si në zbatimin praktik të ligjit, ashtu edhe në strukturën shoqërore. Një shoqëri ka nevojë për norma të qarta, të kuptueshme dhe të zbatueshme. Ndryshime të tilla, të cilat nuk marrin parasysh traditën, natyrën biologjike dhe moralin shoqëror, krijojnë më shumë probleme sesa zgjidhje”, theksohet në reagim.
Më tej Komuniteti Mysliman i Shqipërisë nënvizon se familja në traditën islame dhe në kulturën shqiptare është ndërtuar mbi bashkimin natyror të burrit dhe gruas.
“Një shoqëri ku dobësohet familja, është një shoqëri që humb kohezionin dhe stabilitetin. Për këtë arsye, ne besojmë se ndryshime të tilla nuk përputhen me vlerat themelore të familjes, por përkundrazi, mund të cenojnë seriozisht të ardhmen e saj. Çdo koncept që e relativizon apo mohon këtë realitet, bie ndesh me parimet mbi të cilat është ndërtuar familja” theksohet në reagim.
“Përfshirja e nocioneve të paqarta mbi gjininë, dhe sidomos dhënia e tyre e statusit juridik, rrezikon të dobësojë institucionin e familjes, duke i hapur rrugë keqinterpretimeve në arsim, në punësim dhe në jetën shoqërore” theksohet më tej në reagim.
Komuniteti Mysliman i Shqipërisë sqaron se “Ky projektligj nuk është konsultuar me ta dhe ne nuk kanë asnjë informacion mbi mënyrën dhe bazat e ndërtimit të tij.
“Institucionet fetare kanë një rol të rëndësishëm në shoqëri, pasi ato përfaqësojnë besimin, traditën, moralin dhe vlerat shpirtërore të një populli. Çështje kaq të ndjeshme, që lidhen drejtpërdrejt me familjen, moralin dhe rendin shoqëror, nuk mund të trajtohen vetëm në nivel teknik apo politik, pa marrë parasysh dimensionin shpirtëror dhe kulturor të tyre. Për këtë arsye, është e domosdoshme që institucionet fetare të përfshihen në procesin e konsultimeve për të dhënë kontributin e tyre në ruajtjen e ekuilibrave shoqërorë. Përvoja ka treguar se ligje që nuk marrin parasysh këtë dimension, shpesh sjellin ndasi dhe pakënaqësi në shoqëri”
Discussion about this post