Ditët e fundit sulmet mes PD dhe LSI janë intensifikuar, duke lënë në harresë kohën kur ishin bashkë në koalicion kundër kryeministrit Rama. Së fundmi, kreu i PD, e ka konsideruar si “koalicion non grata”, bashkëpunimin e LSI me Berishën më 6 mars, duke provokuar reagime nga selia e Kryemadhit.
Në një postim në Facebook, LSI shkruan se pa të, Lulzim Basha nuk do të ekzistonte, ndërsa i rendit sipas saj, disa momente politike kur LSI ka ndihmuar Bashën të qëndrojë në politikë.
“Qylaxhiu Brava, që as nuk do të ekzistonte pa LSI. Brava s’do të ishte bërë kurrë Ministër në vitin 2005 nëse LSI nuk do t’i hiqte 18 mandate Fatos Nanos. Brava s’do të bëhej kurrë Ministër i Brendshëm në vitin 2009 pa votat e deputetëve të LSI në parlament. Brava s’do ta kishte parë kurrë as në ëndërr derën e Bashkisë së Tiranës pa 23 mijë votat e LSI dhe pa 1500 votat e Hysni Milloshit, që u regjistrua në zgjedhje nga këshilltarja bashkiake e LSI. Brava s’do të ishte bërë kurrë as në ëndërr kryetar i PD nëse nuk do të ishte kryetar bashkie. Bravën do ta kishin përzënë si qen dhe PD do të shkatërrohej, do copëtohej në momentin e Reformës në Drejtësi nëse s’do të ishte Ilir Meta kryetar i LSI dhe i Parlamentit që e shpëtoi duke e futur Bravën në proces dhe duke iu imponuar edhe ndërkombëtarëve për ta pranuar. Brava do të ishte asgjësuar politikisht me kohë po të mos kishte qenë Ilir Meta kryetar i LSI, që nuk pranoi kurrë zgjedhje pa PD. LSI duke i besuar Bravës së telekomanduar nga Rama dogji mandatet dhe nuk mori pjesë as në zgjedhjet lokale”, shkruan LSI.
Discussion about this post