Sesioni i ri parlamentar që nis në shtator pritet të hapet me diskutime të nxehta rreth Kodit të ri Penal, i cili ka ngjallur reagime të forta jo vetëm nga opozita, por edhe nga juristë dhe përfaqësues të institucioneve të drejtësisë.
Shqetësimi kryesor lidhet me faktin se shumë nene parashikojnë dënime penale edhe për shkelje që më parë trajtoheshin administrativisht, duke sjellë një përqendrim të tepruar tek masa “burg”.
Një nga rastet më të përfolura është neni 424, i cili përcakton se moskryerja e kontrollit teknik të mjetit (kolaudimit), apo kryerja e tij në kundërshtim me ligjin, kur krijon rrezik për jetën e qytetarëve ose ndotje mjedisore, konsiderohet vepër penale dhe dënohet me gjobë ose deri në dy vite burgim.
Pra, një vonesë për ta çuar makinën në kolaudim, apo një certifikatë teknike që nuk është në përputhje me normat ligjore, mund të përfundojë në gjykatë, madje edhe me masa të rënda si burgimi.
Sipas juristëve, ky formulim i ri i ligjit nuk bën dallim mes shkeljeve të rënda dhe të lehta, dhe rrezikon të rëndojë sistemin penal me raste që mund të trajtoheshin me gjoba apo paralajmërime.
Qytetarëve u mbetet të jenë më të kujdesshëm se kurrë me kolaudimin, sepse me rregullat e reja, një pakujdesi e zakonshme mund të kthehet në çështje penale.
Discussion about this post