Nga sot hyjnë në fuqi disa ndryshimet e reja në Kodin Rrugor, të cilat parashikojnë masa më të ashpra për shkelësit, me synim rritjen e sigurisë në rrugë dhe uljen e numrit të aksidenteve.
Një nga ndryshimet më të rëndësishme lidhet me drejtuesit e mjeteve që kapen në mënyrë të përsëritur duke drejtuar automjetin në gjendje të dehur. Në këto raste, leja e drejtimit do të hiqet përfundimisht.
Ndryshimet parashikojnë gjithashtu se personat në moshë madhore që drejtojnë automjet pa qenë të pajisur me leje drejtimi do të gjobiten dhe nuk do të kenë mundësi të pajisen me patentë sipas parashikimeve të reja ligjore.
Për të miturit që kapen duke drejtuar automjet, regjistrimi në autoshkollë do të lejohet vetëm pasi të kenë mbushur moshën 20 vjeç.
Rregulla të reja janë vendosur edhe për shoferët e rinj, të cilët nuk do të lejohen të qarkullojnë me shpejtësi mbi 90 km/orë në autostrada. Tejkalimi i këtij kufiri dënohet me gjobë nga 5 mijë deri në 15 mijë lekë, pezullim të lejes së drejtimit për një muaj dhe heqje pikësh.
Një tjetër ndryshim i rëndësishëm është se nuk do të lejohet më konvertimi i pezullimit të lejes së drejtimit në pagesë me dyfishim të gjobës.
Kodi i ri parashikon masa më të rënda edhe për shkeljet që lidhen me shpejtësinë në zonat e banuara, pranë shkollave, si dhe për garat apo manovrat e rrezikshme në rrugë. Në këto raste, gjobat variojnë nga 20 mijë deri në 60 mijë lekë.
Po ashtu, drejtuesit e mjeteve që identifikohen dy herë brenda një viti duke përdorur telefonin celular gjatë drejtimit të automjetit do t’u pezullohet leja e drejtimit për tre muaj.
Ndryshimet prekin edhe përdoruesit e mjeteve të lehta. Nga sot ndalohet përdorimi i celularit gjatë drejtimit të biçikletave, motorëve deri në 50 kubikë dhe monopatinave.
Discussion about this post