Policia e Tiranës ditën e sotme ka sekuestruar një sasi kokaine, ndërsa në pranga kanë rënë 3 persona.
Burimet zyrtare kanë bërë me dije se në kuadër të operacionit të koduar “Three stars” pas hekurave ra edhe shtetasi Robert Domi. Gazetarja Klodiana Lala raporton se Robert Domi është djali i ish-nënkryetares së bashkisë së Shijakut, Shpresa Domi.
Domi shërbente si nënkryetare e bashkisë së Shijakut deri në vitin 2018, ku u largua nga detyra.
Ajo konkurroi së fundmi për drejtimin e PS-së në Shijak dhe lajmërimi u bë nga vetë Edi Rama.
“Tre kandidatët e përzgjedhur për fazën finale, Fatmir Koçi, Shpresa Domi dhe Brusi Vora paraqitën para Asamblesë së Zgjeruar të bashkisë Shijak platformat e tyre të kandidimit,” shkruante Rama.
Domi u vu në pranga së bashku me dy shtetas të tjerë, të cilët në bashkëpunim me njëri-tjetrin, furnizonin me lëndë narkotike kokainë, disa rrjete shpërndarësish.
Atyre iu sekuestruan 1 kg e 52 gramë lëndë e dyshuar narkotike kokainë, 4 aparate celulare, 1400 euro dhe 78 900 lekë.
Discussion about this post