Një tjetër sasi droge u sekuestrua ditën e martë nga Policia në kontejnerët e kompanisë “Alba Exotic Fruit”, në pronësi të Eduard Dautit.
Mësohet se kontejneri kishte mbërritur në portin e Durrësit 17 ditë më parë dhe ishte vendosur në vendin e kontejnerëve me risk. Policia e Durrësit dhe task-forca e instaluar prej disa kohësh në port vazhdojnë kontrolle të imtësishme te pjesa më e madhe e kontejnerëve që vijnë nga Amerika Latine.
Në një njoftim zyrtar, policia tha se në vijim të operacionit “Rada” u kapën 7.7 kg kokainë, e ndarë në 8 pako. Kokaina ishte e fshehur në pjesën fundore te kapakët e motorëve frigoriferike dhe vinte nga Ekuadori në llogari të firmës “Alba Exotic Fruit”.
Agjencia Amerikane Kundër Drogës (DEA) u ka dërguar informacione autoriteteve shqiptare pak muaj më parë në lidhje me sasinë e madhe të kokainës që ishte vendosur në kontejnerët me banane në Ekuador dhe që kishte si destinacion përfundimtar Shqipërinë.
DEA ka dhënë edhe një shifër mbi sasinë e kokainës së ngarkuar dhe e ka nisur këtë informacion në Shqipëri. Për këtë arsye, autoritetet shqiptare vazhdojnë kontrollet në kontejnerët e kompanisë së bananeve, shkuan Panorama.al.
Hetimi u bë nën drejtimin e SPAK, ndërsa në muajin korrik është bërë arrestimi në flagrancë i Barjon Gumenit, menaxheri i firmës dhe është shpallur në kërkim administratori i firmës, Eduart Dauti.
Dauti nuk di të ndalet në trafikun e drogës, ku kjo është hera e pestë që në kontejnerët e kompanisë së “Alba Exotic Fruit” gjendet kokainë.
