SPAK ka sekuestruar kompaninë e bananeve “Alba Exotic Fruit”. Emri i kësaj kompanie ka dalë disa herë në media, për shkak se në kontejnerët me të cilat transportonte fruta, është gjetur 5 herë drogë.
GJKKO, më herët ka caktuar masën e sigurisë “Arrest me burg” për pronarin e kompanisë Eduart Dauti, i cili është shpallur në kërkim.
Historiku i drogës së kapur në llogari të “Alba Exotic Fruit”
Pas 5 ngarkesave me banane ku u kap kokainë, tashmë SPAK ka vendosur nën sekuestro kompaninë “Alba Exotic Fruit” me aksioner kryesor Eduart Dautin, i cili është dhe person i shpallur në kërkim.
Kujtojmë këtu që 3 ditë më parë, në llogari të kësaj kompanie u kapën 10 kg lëndë narkotike. Në 7 shtator u kapën 7.7 kg kokainë, gjithashtu edhe në 13 korrik në Portin e Durrësit, kësaj kompanie iu sekuestruan 11 kg e 675 gramë kokainë, ndërsa 10 ditë më vonë, më 23 korrik u gjetën 6.5 kilogramë të tjera, të cilat ishin fshehur në kontejnerët e po të njëjtës kompani. Në 29 korrik 2021 kompanisë iu gjetën dhe u sekuestruan 7.25 kilogramë kokainë, pra janë pikërisht 5 raste në vendin tonë, ku bëhet fjalë për të njëjtën emër kompanie të përfshirë.
Gjithashtu bëhet me dije se ajo rezulton të jetë e përmendur edhe në Greqi, ku u gjetën 137 kg kokainë.
