Detaje të reja janë zbardhur nga kapje e një ton kokaine ditën e djeshme në një magazinë në fshatin Zeta në Malin e Zi. Sipas hetimeve rezulton se kokaina e ka origjinën në Amerikën Latine. Kjo është e njëjta formë e trafikimit të kokainë së kapur në Portin e Durrësit e cili ishte e fshehur në kontejnerin me banane.
Droga ishte fshehur në kontejnerin me banane dhe kishte ndaluar në disa porte të ndryshme përpara se të mbërrinte në Malin e Zi. Kur anija “MSC Charlotte” lundroi në drejtim të Tivarit me flamurin e Liberisë, policia malazeze dhe punonjësit e doganave tashmë e kishin informacionin e saktë përmes partnerëve ndërkombëtar se në të gjendej një sasi e madhe, jo vetëm me banane ekzotike të Amerikës Latine, por edhe kokainë.
Anija “MSC Charlotte” mbërriti në Portin e Barit në datën 24 gusht, ndërsa më parë ishte ndaluar në Portin e Koperit në Slloveni. Ajo është një anije e vogël, e cila merr kontejnerë nga destinacione të largëta nga porti italian i Gioia Tauro dhe i transporton ato nëpër detet Adriatik dhe Egje. Vlera monetare e një ton kokainë e sekuestruar të premten në mëngjes shkon deri në 100 milionë euro, nëse do të kishte përfunduar në treg.
Në pranga për drogën ranë babë e bijë, Budimir dhe Marina Krstović, të arrestuar në magazinën e tyre në fshatin Zeta të Malit të cilët akuzohen për kryerjen e veprës penale të prodhimit, mbajtjes dhe shpërndarjes së lëndëve narkotike. Të dy kanë mohuar përfshirjen në kontrabandën e kokainës në polici. Policia është në kërkim të të dyshuarve të tjerë.
Kjo është sasia më e madhe e kokainës e kapur ndonjëherë në vendin fqinj. Në kallëpet e drogës ishte mbishkrimi “Covid”, ndërsa bëhet fjalë për 1205 pako në total, me një peshë rreth 1 kg secila. Efektivët e antidrogës pikasën kokainën në port dhe e lanë të kalonte për të parë se ku do të ishte destinacioni final i saj. Droga po transportohej me kamionin me targa PG-353GA që e la ngarkesën në një magazinë në fshatin Zeta, ku u mor më pas nga babë e bijë.
