Apeli i GJKKO ka marrë vendim për dosjen e 137 kilogramë kokainë, që janë gjetur në Portin e Durrësit dhe që vinin nga Ekuadori. Është lënë në fuqi vendimi edhe për Gentian Malindin, i akuzuari kryesor për trafikimin e lëndëve narkotike.
Episodi i trafikimit të 137 kilogramëve kokainë në vitin 2019, do t’i kushtojë 8 vite e tetë muaj burg Gentian Malindit, aq sa ishte marrë vendimi edhe herën e parë nga gjykata. Malindi u dënua në total me 13 vjet heqje lirie, por përfitoi uljen e një të tretës nga gjykimi i shkurtuar.
Procesi ndaj tij filloi në mungesë, por pas arrestimit i dyshuari dhe avokati i tij kërkuan gjykim të shkurtuar për akuzën e trafikimit ndërkombëtar të narkotikëve.
Gentian Malindi u arrestua më 27 tetor 2022 në zonën e Vorës pasi ishte shpallur në kërkim pas kapjes së ngarkesës me 137 kilogramë kokainë në portin e Durrësit.
Para mbërritjes së ngarkesës në Shqipëri, kontejneri ishte hapur në portin e Pireut në Greqi, ku agjentët e huaj kishin ndërruar kokainën me oriz, duke lënë vetëm një pako me lëndë narkotike për efekt të hetimeve.
Në pakot e kokainës u vendos edhe një pajisje gjurmuese, GPS, ndërkohë pas mbërritjes së ngarkesës në port, personat që shkuan për ta marrë përveç Gentian Malindit ishin edhe Altin Myslihaka që u arrestua dhe dënua me 10 vite burg dhe Ardian Bega i dënuar me 8 vite e 4 muaj burg me gjykim të shkurtuar, i cili punonte si oficer i Sigurisë në portin e Durrësit.
Ngjarja ndodhi më 19 shtator 2019, kur kontejnerët ku ishte fshehur kokaina kishin mbërritur prej dy ditësh nga Ekuadori në Durrës pasi kishin kaluar tranzit nga porti i Pireut në Greqi.
Gentian Malindi, Altin Myslikhaka dhe Ardian Bega u paraqiten në port dhe hapën një nga kontejnerët dhe morën disa prej pakove të ngarkesës.
Discussion about this post