Policia e Tiranës ka vënë në pranga tre persona, dy prej tyre vëllezër, pasi akuzohen se shpërndanin lëndë narkotike të llojit kokainë dhe cannabis sativa.
Sipas policisë, dy vëllezërit me iniciale G. H., 25 vjeç dhe A. H., 20 vjeç, në bashkëpunim me njëri-tjetrin siguronin sasi të lëndës narkotike cannabis sativa dhe më pas e shisnin atë në doza të vogla, në zona të ndryshme të Tiranës.
Gjatë kontrollit fizik të ushtruar nga shërbimet e Policisë, të rinjve iu gjet e iu sekuestrua në cilësinë e provës materiale lëndë e dyshuar cannabis sativa, 1 peshore elektronike, fishekë luftarakë, 1 dorezë metalike (përforcues grushti), dy aparate celularë, 1 patentë dhe kartë ID të dyshuara të falsifikuara.
Gjithashtu, po në kuadër të operacionit “Braka” u bë arrestimi në flagrancë i një 39-vjeçari, i cili merrej me shitje të lëndës narkotike të llojit kokainë në zona të ndryshme të Tiranës, duke e kamufluar aktivitetin e tij kriminal, me një mjet taksi që kishte në përdorim.
Gjatë kontrollit, këtij personi iu gjetën doza me lëndë narkotike kokainë dhe një shumë parash, të cilat u sekuestruan në cilësinë e provës materiale bashkë me mjetin.
Materialet procedurale i kaluan Prokurorisë së Shkallës së Parë të Rrethit Gjyqësor Tiranë, për veprat penale “Prodhimi dhe shitja e narkotikëve”, “Falsifikimi i letërnjoftimeve, i vizave ose i pasaportave”, “Mbajtja pa leje e armëve të ftohta” dhe “Mbajtja pa leje e municionit luftarak”.
Discussion about this post