Aktivistja shqiptaro-amerikane Evi Kokalari, e cila ka krijuar Lëvizjen Konservatore, është shprehur e gatshme të bashkëpunojë me Lulzim Bashën, edhe pse dy vjet më parë u angazhua në krah të ish-Kryeministrit Sali Berisha, në një tur takimesh që u pagëzuan si “Foltorja” kundër kreut të PD-së në atë kohë.
Kokalari në një intervistë për Euroneës Albania u shpreh se në muajin tetor do të jetë në Tiranë, ku shprehu gadishmërinë për tu takuar me Bashën, i cili së fundmi ka marrë drejtimin e PD-së zyrtare, pavarësisht se ndodhet në një përplasje të hapur me Gazment Bardhin dhe 19 deputetë, që nuk e njohin si kryetar.
Por, Kokalari i ka vendosur disa kushte Bashës, të cilat duhet të plotësohen prej tij, dhe në këtë rast aktivistja do të bashkëpunojë në largimin e kryeministrit Rama në vitin 2025.
“Unë do jem në Shqipëri në tetor dhe jam shumë e hapur të ulem me Lulzim Bashën. Po me Lulzim Bashën nuk mund të jem në koalicion, po qe se Lulzim Basha nuk arrin të bjerë dakord me disa gjëra që unë dua të bëj.
Në 2025-ën ne e heqim Edi Ramën, dhe ato që dua unë janë shumë ekstreme. Në qoftë se Basha firmos një letër që bie dakord me katër, pesë pika, që unë dua të realizoj në Shqipëri, ulem të diskutoj në detaje dhe them që ajo është PD-ja zyrtare që duhet forcuar.
Është e vetmja mënyrë që ndoshta mund ta fitojmë 2025. Është për të parë se shumë gjëra kanë ndryshuar. Me Berishën nuk kam asnjë komunikim dhe nuk ka asnjë arsye për të pasur një komunikim ”, tha Kokalari.
Kur shfaqej në krah të Berishës, për të cilin deklaronte se po tregonte dinjitet me “Foltoren”, Kokalari akuzonte Bashën se po përdor SHBA për të pastruar pisllëqet e tij. Tashmë që ka ndryshuar pozicion, nuk dihet nëse Kokalari është e bindur se Basha është pastruar nga pisllëqet, sikundër shprehej aktivistja, apo Kokalari do e përdorë Bashën, njëlloj sikundër përdori Berishën dhe Foltoren, për t’u bërë pjesë e politikës aktive në Shqipëri.
Discussion about this post