Viti 2021 u mbyll me një numër të lartë aksidentesh në vendin tonë dhe shumica prej tyre rezultuan fatal. Në lidhje me këtë çështje ka folur sot gjatë një interviste televizive Komandanti i policisë rrugore në Tiranë, N/Komisari Arben Bakalli. Ai tha se fikja e semaforëve gjatë natës është bërë shkak për shtimin e aksidente. Bakalli ka evidentuar këto problematika, ndërsa iu ka bërë apel shoferëve të jenë edhe më të kujdesshëm.
“Duke kombinuar disa problematika me njëra tjetrën, duke vënë në fokus lodhjen, pagjumësinë e drejtuesve të mjetit, ashtu si dhe përdorimi i pijeve alkoolike, njëkohësisht dhe mosrregullimi i shpejtësisë, ecja mbi normat e lejuara në qendrat e banuara bëhen një objekt kryesor për aksidentet rrugore, semaforët pulsantë,” u shpreh komandanti i Policisë Rrugore Tiranë.
Ndër të tjera ai shtoi se, numri më i lartë i aksidenteve ndodh ditën për numrin e lartë të automjeteve që qarkullojnë, megjithatë aksidentet që ndodhin natën kanë më shumë dëme tek njerëzit. “Aksidentet rrugore janë më të shumta ditën për shkak të lëvizjes së madhe dhe dinamikës që ka në pjesën e parë të ditës nga ana e drejtuesve të mjeteve por aksidentet natën janë më të dëmshme në njerëz”, tha Bakalli.
Krahas shkeljeve të tjera që konstaton policia rrugore sipas komandantit vendos edhe disa pika kontrolli gjatë natës për pije alkoolike. Pas mesnate semaforët në kryeqytet nuk funksionojnë normalisht por pulsojnë vetëm ngjyrë portokalli që të paralajmërojnë drejtuesin e mjetit të bëjnë kujdes.
Discussion about this post