Shqipëria do të përballet sot me San Marinon, në kuadër të raundit të katërt të grupit 1 të Ligës së Kombeve, sfidë e cila do të zhvillohet në “Air Albania”, prej orës 20:45.
Për kuqezinjtë, kjo përballje vlen për shumë arsye. Së pari, një kthim te fitorja do të ishte një hap i rëndësishëm, jo vetëm për të harruar atë se çfarë ndodhi në Helsinki, por edhe për rëndësinë që kanë pikët në këto çaste. Së dyti, golavarazhi. Në raport me rivalin direkt siç është Finlanda, jemi dukshëm pas.
Skuadra jonë ka shënuar 6 gola dhe ka pranuar 2, ndërsa nordikët që mbajnë momentalisht kreun, 9 të shënuar dhe vetëm një të pësuar. Një mundësi e mirë për “djemtë” e Maran që të thellojnë këtë bilanc dhe ta shfrytëzojnë në maksimum, duke parë dhe nivelin e kundërshtarit.
Sakaq, përtej vlerës dhe fokusit kryesor që ka përballja me San Marinon, te Shqipëria do të ketë një sy edhe tek dueli mes Bjellorusisë dhe Finlandës, ndeshje që do të luhet në të njëjtën orë. Për herë të fundit, dueli mes dy skuadrave përfundoi në barazimin pa gola dhe një rezultat i ngjashëm do t’i shkonte në favor skuadrës sonë për të marrë kreun. Sigurisht, nëse kalohet me sukses dhe bindshëm, “testi” San Marino.
Kujtojmë se për Shqipërinë kjo sfidë do të jetë edhe e fundit sa i takon muajit tetor, për t’u kthyer në nëntor me dy ndeshjet e mbetura, ndaj Finlandës në shtëpi dhe Bjellorusisë jashtë.
Discussion about this post