Trajneri i Kombëtares U-21, Alban Bushi ka bërë sot publike listën e lojtarëve që janë grumbulluar për kualifikueset e nëntorit kundër Sllovenisë dhe Kosovës.
Në konferencën e dhënë për mediat, Bushi theksoi se edhe në këto sfida talenti që po shkëlqen me Legian nuk do të grumbullohet nga përfaqësuesja e parë, ndërsa shtoi se qëllimi është të mbahet vendi i dytë në grup.
“Muçi do të jetë në listën tonë, Ne nuk kemi sulmues alternativ, pasi Tuci, Bullari, Gjata nuk janë prej fillimi. Ardian Bajrami do jetë një element i rëndësishëm jo vetëm për U-21 por edhe për kombëtaren A. Kemi shumë lojtarë datëlindje 2002 dhe janë edhe për të ardhmen. Nuk është se kemi pasur probleme, pasi jemi paraqitur mirë kohët e fundit. Lojtarët na kanë ndjekur, kanë sakrifikuar dhe kanë bërë maksimumin. Jemi Shqipëria dhe duhet të japim 200%. Synojmë vendin e dytë, por ekipet e tjera në letër janë më të forta. Fillimi i mirë është gjysma e punës. Suksesi më i madh do jetë që të kalojnë 4-5 lojtarë, që e kanë kualitetin të bëhen pjesë e kombëtares së madhe. Ua kemi dhënë mundësinë të gjithë lojtarëve të kampionatit. Ata që luajnë janë marrë, si lojtarët e Kukësit Tafa e Peposhi. Kishim edhe Prengën e Laçit, që ka marrë pak minuta kohët e fundit. Jemi munduar t’i alternojmë, të marrim nga kampionati ynë dhe nga jashtë.”- u shpreh ai.
Ndërsa më tej ai shtoi se në muajin mars Kombëtarja e parë do të jetë pushim dhe theksoi se duke shfrytëzuar këtë rast mund të marrë te ‘Shpresat’ Brojën dhe Kumbullën.
“Çdo ndeshje është e rëndësishme për ne, për lojtarët. Kur vesh fanellën e Shqipërisë është e rëndësishme, edhe të stërvitesh e jo më të luash. Ne i kemi sytë te ndeshja me Slloveninë. Nëse fitojmë kemi shumë shanse për vendin e dytë. Në mars Shqipëria është pushim dhe mund të marrim edhe lojtarë si Kumbulla e Broja.”-tha ndër të tjera Alban Bushi./K.T/Gijotina.com
Discussion about this post