Shpërthimi i zjarrit tragjik në spitalin Covid të Tetovës, ka bërë kurioz shumë njerëz për fillesën e ngjarjes dhe se cilat mund të kenë qenë shkaqet që e kthyen spitalin jo vetëm në rrënoja, por në vendi e 14 viktimave.
Flakët përpinë shumë shpejt dhomat ku ishin shtruar të sëmurët duke mos i dhënë asnjë mundësi reparteve zjarrfikëse që të ndërhynin. Verifikime të tjera janë duke u bërë, çka tregon se bilanci mund të rëndohet në orët në vijim.
Deri më tani nuk ka një shkak zyrtar të zjarrit në spitalin e Tetovës, edhe pse flakët në repartet Covid janë një fenomen i shpeshtë në të gjithë botën që prej fillimit të pandemisë.
Në një udhëzim të Komisionit Europian, ku bëhet një përshkrim i shkaqeve të zjarreve në spitale të ndryshme si edhe numrit të të vdekurve në to, jepet edhe këshilla kryesore: KUJDES me rrjedhjen e oksigjenit!
Nga hetimet e bëra prej autoriteteve në Indi, ku deri më tani janë shënuar 24 incidente të lidhura me zjarrin në repartet Covid, rezulton se pjesa më e madhe e tyre ka patur si shkak fillestar një shkëndijë elektrike në telat e energjisë që lidhen me aparaturat apo sistemin e përgjithshëm elektrik të spitalit.
Edhe pse shkaku fillestar mund të jetë një shkëndijë elektrike, elementi që nxit zjarrin të përhapet me shpejtësi në spital është pikërisht oksigjeni. Ai gjendet me sasi më të larta në repartet Covid dhe sidomos në pjesën e kujdesit intensiv apo ku mbahen të intubuarit.
Në rastin e Tetovës situata duket të ketë qenë edhe më në disfavor të të sëmurëve pasi spitali ishte i përbërë prej materialeve të njohura si “sanduiç”, të cilat digjen shumë më shpejt.
