Të shumtë kanë qenë personazhet që kanë marrë pjesë ditën e sotme në homazhet e bëra në stadiumin ‘Selman Stërmasi’ për komentatorin Kosta Grillon, që humbi jetën nga Covid-19.
Kolegu i tij, Ditan Shakohoxha ka thënë mes lotësh se i dha si një dhuratë të fundit mikut të tij mikrofonin me të cilin komentoi finalen e ‘Euro 2020’
“Sot kam ardhur këtu me këtë mikrofonin që është i ndeshjes së fundit që kam komentuar unë në Londër në finalen e EURO 2020. Këtë mikrofon e kisha marrë dhe doja ta ruaja për gjithë jetën time, pjesën më të madhe të karrierës sime e kam kaluar me Kostën. Këtë mikrofon e solla për t’ia dhënë mikut tim me vete që për fat të keq edhe ai nuk do të komentojë më, por të paktën ta ketë këtë me vete.”-tha Shakohoxha.
Më tej ai kujtoi ndeshjen me Armeninë, për të cilën tha se në fund se bashku me Grillon e komentuan të përqafuar.
“Nga Kosta vetëm një gjë mund të kujtoj dhe është i vetmi kujtim që më vjen është në Jerevan. Në minutat e fundit ndaj Armenisë ku pritej vetëm vërshëllima e gjyqtarit dhe momenti që nuk do e harroj kurrë është që dy minutat e fundit, Kosta komentonte për TVSH, unë për DigitAlb, i kemi komentuar të përqafuar bashkë, është e vetmja gjë që mund të kujtoj.”-tha Shakohoxha.
Kosta Grillo u nda nga jeta në moshën 59-vjeçare pasi qëndroi disa javë në intubim në spital në Turqi./K.T/Gijotina.com
