Deputeti demokrat Ervin Salianji tha mbrëmjen e sotme se dekreti i Presidentit për ligjin mbi komisionet hetimore nuk ka asnjë rëndësi, pasi edhe në rast se do e kthente në Kuvend, sërisht do të ishte në dorën e mazhorancës socialiste.
Në emisionin Top Story, Salianji tha se fokusi i vendosur te Presidenti i Republikës dhe jo te Edi Rama, është një zallamahi në një gotë ujë.
“Është një çështje që duhet të zgjidhet nga politika, jo nga Presidenti. Çështja e Komisioneve Hetimore është vullnet politik, nuk mund të presim zgjidhje nga Kreu i Shtetit”, tha Salianji.
Ai tha se opozita e ka betejën me mazhorancën, me Edi Ramën dhe jo me Presidentin e Republikës.
“PD dhe opozita është në përballje me regjimin që kontrollon çdo institucion. Presidenti duhet të luajë rolin Kushtetues, por në çështjen e Komisioneve Hetimore nuk ka asnjë rol. Presidenti e shikon ligjin sipas procedurave, nuk është Gjykatë Kushtetuese që ai të marrë në analizë ligjin”, tha Salianji.
Discussion about this post