Komisioni Evropian ka reaguar pas paralajmërimeve të kryeministrit Edi Rama për marrjen e masave ndaj personave të përfshirë në protesta të dhunshme, përfshirë kufizimin e hyrjes së tyre në vendet e Bashkimit Evropian.
Në një përgjigje për BIRN, zëdhënësi i Komisionit Evropian theksoi se vendimet për lejimin ose refuzimin e hyrjes në territorin e vendeve anëtare janë kompetencë e vetë shteteve, në përputhje me legjislacionin evropian dhe atë kombëtar.
“Vendimet për lejimin ose refuzimin e hyrjes në territorin e shteteve të veçanta anëtare të BE-së bien në kompetencën e shteteve anëtare përkatëse, në përputhje me legjislacionin në fuqi të BE-së dhe atë kombëtar”, thuhet në përgjigjen e Komisionit.
Reagimi vjen pasi Rama njoftoi se qeveria po përgatit një paketë masash legjislative dhe administrative ndaj personave të përfshirë në akte të dhunshme gjatë protestave, duke përmendur edhe mundësinë e kufizimit të lëvizjes së tyre drejt vendeve të BE-së.
Çështja ngre pikëpyetje edhe në raport me nenin 38 të Kushtetutës së Shqipërisë, i cili garanton të drejtën e qytetarëve për të dalë lirisht jashtë vendit. Ndërkohë, Komisioni Evropian nënvizoi se Shqipëria, si vend kandidat për anëtarësim, duhet të respektojë legjislacionin kombëtar dhe detyrimet ndërkombëtare që lidhen me lëvizjen e shtetasve.
Komisioni komentoi gjithashtu shqetësimet e ngritura nga Avokati i Popullit lidhur me trajtimin e protestuesve të ndaluar në komisariate. Sipas gjetjeve të raportuara, janë evidentuar probleme serioze, përfshirë mbipopullimin e dhomave të sigurisë, ankesa për trajtimin e të miturve dhe përdorimin joproporcional të forcës nga policia.
“BE-ja do të vazhdojë të monitorojë nga afër angazhimin e Shqipërisë për sundimin e ligjit dhe mbrojtjen e të drejtave themelore në kontekstin e negociatave të anëtarësimit”, deklaroi zëdhënësi i Komisionit Evropian.
Brukseli theksoi se pjesëmarrja në protesta paqësore është një e drejtë themelore në vendet demokratike, ndërsa nënvizoi se dhuna nuk ka vend dhe se autoritetet duhet të garantojnë rendin publik në përputhje me ligjin.
Sipas qëndrimit të Komisionit, personat përgjegjës për akte dhune duhet të mbajnë përgjegjësi përmes procedurave ligjore, ndërsa çdo reagim i autoriteteve duhet të jetë proporcional dhe në përputhje me ligjin.
Discussion about this post