Komisioni për Çështjet Ligjore, Administratën Publike dhe të Drejtat e Njeriut shtyu sot shqyrtimin e shtesave dhe ndryshime në Kodin Zgjedhor, të propozuara nga Partia Socialiste dhe Partia Demokratike.
Në fillim të mbledhjes, kryetarja e Komisionit, Klotilda Bushka informoi mbi kërkesën e deputetit të PD-së, Oerd Bylykbashi për shtyrjen për ditën e nesërme të ndryshimeve në Kod, për shkak të pamundësisë për të marrë pjesë në mbledhjen e sotme.
Kërkesa e Bylykbashit gjeti miratimin e deputetit të PS-së, Damian Gjiknuri, ndaj komisioni vendosi shtyrjen e shqyrtimit të ndryshimeve në Kodin Zgjedhor.
Duke reaguar mbi këtë vendim, deputeti opozitar, Enkelejd Alibeaj e konsideroi pazarin e radhës mes PS-së dhe PD-së.
Alibeaj theksoi se prej 1 viti e gjysmë ka depozituar në Kuvend 10 projektligje për ndryshime në Kodin Zgjedhor të cilat nuk janë marrë ende në shqyrtim.
“Me sa duket për ndryshimet në Kodin Zgjedhor dy vëllezërit siamezë nuk e kanë gjetur gjuhën sot. Ka të paktën 1 vit e gjysmë që kam depozituar një set ndryshimesh lidhur me Kodin Zgjedhor. Donit të bënit pazar si në 26 korrik dhe e bëtë atë pazar por nuk e bëtë aq mirë. Po sillni prapë një pazar të ri, po e shtyni dhe po e shtyni procesin. E kuptoj fare mirë, situata është fare e qartë për këdo se para respektimit të rregullave të këtij parlamenti prevalon gjithmonë marrëveshja, por ju së paku si kryetare e komisionit jeni të detyruar që ato propozime të miat t’i sillni t’i shqyrtojmë”, tha Alibeaj.
Në përgjigje të Alibeajt, Bushka sqaroi se dy projektligjet të cilat u shtynë për nesër kanë në thelb votën e diasporës për mbulimin e kostos për kthimin e fletëve të votimit si dhe çështjet e mirëorganizimit të procesit të kërkuar nga KQZ.
“Këtu nuk bëhet fjalë për pazar. Sa i takon nismave tuaja, po kemi një proces i cili përveç nismave tuaja ka edhe nisma të tjera. Edhe unë kam një nismë për ndryshimet në Kodin Zgjedhor që jam pjesë e punës në këtë Kuvend, por siç ka një traditë parlamentare ka tashmë një proces që duhet të ndodhë me bashkëdakordësinë e të gjithëve dhe ka po ashtu rekomandime të OSBE/ODIHR që duhet të adresohen. Është një proces në vijim, kur të jeni të gjithë dakord të ulemi në këtë komizion dhe të shqyrtojmë këto çështje”, tha Bushka.
Discussion about this post