Këtë të martë, është mbledhur Komisioni i Medias dhe Informimit ku deputetët kanë qenë të pranishëm në sallë. Opozita, nëpërmjet deputetit Luçiano Boçi ka kërkuar rikthimin e kamerave në Komisione pasi rregullorja parashikon që kamerat të filmojnë 6 minuta në fillim të seancës dhe gazetarët duhet të jenë të pranishëm, me kushtin që të jenë vaksinuar.
Luçiano Boçi: Ne njoftohemi se ka mikrofona ambientalë dhe do përgjohemi. Kjo nuk është normale. Po na duhet vetja sikur jemi në përgjime. Ne pranojmë të përgjohemi ndërkohë që gazetarët nuk i lejojnë të futen por ne përgjohemi. Duhet ta nisim nga vetja jonë, nëse e nisim kujdes se na përgjojmë, atëherë ne nuk jemi të lirë. Mosprania e mediave ndikon në transparencë. Të jemi seriozë në punën tonë.
Nga ana tjetër, deputeti socialist Petro Koçi ka nënvizuar se kjo mënyrë e të bërit seancë, është kushtëzuar nga mungesa e hapësirave.
Petro Koçi: Për mua nuk është problem që të vijnë 100 gazetarë. Prandaj është lënë që të vijnë dhe të marrin pamje që ti përdorin në televizionet ku punojnë e më pas kanë komunikimin online. Lidhur me mikrofonat ambiental, janë të dukshëm, pastaj njerëzit të jenë të kujdesshëm në fjalor. Nuk besoj se ka lidhje me përgjimin.
Sakaq, deputetja Ina Zhupa, ka kërkuar që ministrja e Arsimit Evis Kushi të jetë e pranishme në komision dhe të shpjegojë çdo të ndodhë me mësimin në universitete, që është parashikuar të nisë të hënën e 11 tetorit.
