Pasi kreu demokrat Lulzim Basha deklaroi se do zhvillohet një mbledhje e jashtëzakonshme e Këshillit Kombëtar të PD në orën 15:00, ka reaguar Komisioni i Rithemelimit që doli nga kuvendi i Berishës.
Përmes një deklarate zyrtare, ky komision fton anëtarët e Këshillit Kombëtar të bojkotojnë mbledhjen e thirrur nga Basha, pasi sipas tyre Kuvendi votoi shkarkimin e tij.
“Dje me 4446 vota Kuvendi Kombëtar i PD vendosi shkarkimin e Lulzim Bashës nga posti i kryetarit për shkelje të rënda statutore, si dhe konstatoi paligjshmërinë e pjesës më të madhe të kryesisë si të zgjedhur në dhunim flagrant me statutin e PD. Gjithashtu ju bëjmë me dije se Kuvendi Kombëtar ka mandatuar Komisionin e Rithemelimit për të përmbushur vakumin e krijuar deri në zgjedhjen e kryetarit dhe kryesisë së re”, shkruhet në deklaratë.
Ndër të tjera, ata e konsiderojnë si nul mbledhjen e thirrur nga kryedemokrati dhe bëjnë thirrje për bojkotimin e takimit që e konsiderojnë si të paligjshëm.
“Për sa më lart ju njoftojmë se mbledhja e KK e thirrur nga deputeti Lulzim Basha është nul dhe e paligjshme. Ju bëjmë thirrje të bojkotoni mbledhjen dhe mos bëheni pjese e paligjshmërisë! Ju ftojme gjithashtu të mos bëheni pjese e përçarjes dhe përjashtimeve nga PD për karrigen e thyer të Lulzim Bashës”, thuhet ndër të tjera.
Komisioni i Kuvendit të thirrur nga Sali Berisha ka miratuar dje 29 emrat e Komisionit të Përkohshëm të Rithemelimit të PD-së që do të drejtojë partinë deri në zgjedhjen e kryetarit të ri.
Discussion about this post