Edhe pse nuk kishte këto kompetenca, ditën e sotme Komisioni për Politikën e Jashtme ka miratuar vetëm më votat e anëtarëve të mazhorancës projektligjin që OSHEE të marrë 70 milionë euro kredi nga BERZH. Opozita abstenoi në votim, ndërsa vetëm deputeti Tritan Shehu, votoi kundër.
Gjatë prezantimit të projektligjit për marrjen e 70 milionë euro kredi nga administratori i OSHEE, Ardian Çela tha se deri më 1 janar 2022 nuk do të ketë rritje të tarifës së energjisë elektrike, ndërsa për më tej do të vendos Enti rregullator i Energjisë. “Deri më datë 1 janar tarifa nuk do të preket. Më pas më datë 1 janar enti rregullator do të paraqesë propozimin. Aktualisht nuk është aplikuar për asnjë rritje tarife. Tregu i liberalizuar ka filluar më shumë se vite përpara. Më 1 janar pjesa tjetër që janë të lidhur me tension të mesëm do dalin në treg të lirë. Theksoj se ka përfunduar platforma mes OST dhe OSHEE. Shtoj edhe njëherë se rritje tarifash për 1 milion abonentë që furnizohen nga OSHEE nuk do ketë. Ne krahasimet i kemi bërë me veten. Shqiptarët e kanë harruar atë periudhë kur iknin dritat. Ka ende për t’u bërë por përmirësimet janë të dukshme”, tha Çela.
Gjatë diskutimeve ka pasur përplasje mes anëtarëve të PD dhe PS në komision, ku deputeti i PD, Kreshnik Çollaku u shpreh se taksat dhe çmimet kanë vazhduar të rriten ndërsa qytetarëve nuk u është ofruar cilësia. Kjo nuk është pranuar nga kryetarja e Komisionit Mimi Kodheli, ndërsa u përgjigj se çmimet për energjinë nuk janë rritur. Madje opozita e ka quajtur të pa drejtë këtë vendim, për shkak se ky komision nuk ka kompetencat për miratimin e tij.
