Në mbledhjen e Komisionit Hetimor për Inceneratorët, një nga kërkesat më interesante është ajo drejtuar Ministrisë së Drejtësisë, e cila zbulon lidhjet e afërta direkte të Arben Ahmetajt me Mirel Mërtirin, njërin nga përfituesit e incineratorëve.
Bëhet fjalë për dosjen e drejtësisë maqedonase, e cila zbardh aksidentin e ndodhur në 16 Korrik 2017, ku ngelën të plagosur Arben Ahmetaj dhe Mirel Mërtiri. Komisioni hetimor i kërkon Ministrisë së Drejtësisë që t’i drejtohet autoriteteve gjyqësore të drejtësisë të Republikës së Maqedonisë së Veriut për ndihmë juridike lidhur me aksidentin e datës 16.07.2017, pranë qytetit të Kumanovës, ku u përfshi ish-ministri i Financave Arben Ahmetaj dhe shtetasi shqiptar Mirel Mërtiri.
Ndihma juridike e kërkuar konsiston në vënien në dispozicion të dosjes së plotë hetimore dhe gjyqësore që disponojnë autoritetet maqedonase lidhur me këtë çështje.
Sipas Partisë Demokratike, ka edhe të tjera lidhje të Arben Ahmetajt me përfituesin tjetër të incineratorëve, Klodian Zoto, të cilat nisin që me kompaninë e zotëruar nga Arben Ahmetaj “H Comunication”.
Për këtë arsye, Komisioni Hetimor i kërkon QKB-së të vendosë në dispozicion çdo dokument të shoqërisë Hermes H-Communication, për ortakët, administratorët etj, si dhe t’u përgjigjet pyetjeve se cilët janë pronarët përfitues të shoqërive që përfitojnë nga koncesionet dhe PPP i incineratorëve në Elbasan, Fier dhe Tiranë.
Hetimi do të zbardhë edhe çështje të tjera me rëndësi, që do të hedhin dritë edhe mbi largimin nga detyra të Ministrit të Financave Shkëlqim Cani, i cili kundërshtoi ndërtimin e incineratorëve. Komisioni hetimor i kërkoi Ministres së Mjedisit vënien në dispozicion të objeksionit të ish-ministrit të Financave Z. Shkëlqim Cani lidhur me incineratorin e Fierit; dokumentet e dhënies së bonusit dhe projekti fitues; kërkesën e koncesionarit dhe miratimin tuaj për shitjen e kuotave të kompanisë fituese të projektit për inceneratorin e Fierit.
Discussion about this post