Kuvendi i Shqipërisë dhe Parlamenti Europian i bëjnë thirrje këshillit të BE të përcaktojë sa më parë një datë për konferencën e parë ndërqeveritare me Shqipërinë për hapjen e negociatave. Ky mesazh u përforcua nga një dokument që pritet të miratohet ditën e nesërme nga Komiteti Parlamentar i Stabilizim-Asociimit, i cili ka nisur sesionin e parë të takimit të 14-të.
E pranishme në këtë mbledhje ishte ministrja e Jashtme Olta Xhaçka, e cila theksoi se Shqipëria ka avancuar në plotësimin e të gjitha rekomandimeve të Komisionit Evropian dhe po pret miratimin e kornizës negociuese dhe mbajtjen e Konferencës së Parë Ndërqeveritare.
“Politika e jashtme e Shqipërisë është tërësisht në një linjë me politikën e jashtme të BE-së dhe kjo shprehet edhe në rolin e Shqipërisë si një anëtare e përkohshme e Këshillit të Sigurimit. Shqipëria po ushtron një ndikim mjaft pozitiv në garantimin e sigurisë, paqes dhe stabiliteit në rajon e më gjerë”, tha Xhaçka.
E njëjta gjë është nënvizuar edhe nga Taulant Balla i cili tha se Shqipëria i ka kryer detyrat e saj të shtëpisë. Sipas tij Shqipëria nuk ka qenë kurrë kaq afër ndërmarrjes së hapit më të rëndësishëm atij të vendosjes së marrëdhënieve me BE. Balla gjithashtu u shpreh se vendi ynë është i vendosur të vijojë të arrijë rezultate të qëndrueshme në lidhje me prioritetet kyçe që kanë të bëjnë me reformën në drejtësi, luftën kundër korrupsionit dhe krimit të organizuar, mbrojtjen e të drejtave themelore dhe reformën në administratën publike.
“Viti 2021, ka qenë një vit dinamik. Shqipëria nuk ka qenë kurrë kaq afër ndërmarrjes së hapit më të rëndësishëm të marrëdhënies me Bashkimin Evropian. Nën prizmin e aspiratave tona, mosrealizimi i pritshmërive ka qenë i lidhur ngushtë edhe me mosmarrëveshjen ende të pazgjidhur mes Bullgarisë dhe Maqedonisë së Veriut. Arritjet tona janë pranuar dhe vlerësuar në mënyrë unanime nga të 27 anëtarët e BE. Mundësitë tona për të avancuar në bazë të meritave tona të përmbushjes së kërkesave të Këshillit për mbajtjen e Konferencës së parë Ndërqeveritare nuk kanë qenë kurrë më të mëdha e megjithatë, ne vazhdojmë të mbetemi një dëm kolateral i mosmarrëveshjes Bullgari-Maqedoni e Veriut.”
Nga ana tjetër, në fjalën e saj, Kryetarja e Kuvendit, Lindita Nikolla, nënvizoi se ka ardhur koha që BE të vlerësojë ecurinë e Shqipërisë dhe ta konkretizojë atë më hapjen e konferencës së parë ndërqeveritare.
“Dita për të marrë vendime të guximshme, si për Shqipërinë, ashtu edhe për Maqedoninë e Veriut, ka ardhur prej kohësh. Këtë moment Bashkimi Evropian duhet ta shfrytëzojë e konkretizojë. Shqipëria ka pranuar me vetëdije të plotë dhe ka përqafuar qasjen e bazuar në merita për bisedimet e anëtarësimit. Ne kemi detyrat tona dhe tani është radha e BE-së për të vlerësuar arritjet tona dhe respektuar premtimet”, theksoi Nikolla.
Ambasadori i BE-së në Shqipëri, Luigi Soreca, tha se Shqipëria ka arritje të prekshme në avancimin e reformave.
“Reforma në drejtësi po shënon progres dhe miratimi i ndryshimeve kushtetuese për zgjatjen e afatit të organeve të vetting-ut me një mbështetje të gjerë është pozitiv dhe duket të pasohet nga konsensusi për çështjet e mëdha të zhvillimit të vendit”, tha ambasadori.
Raportuesja e Parlamentit Evropian për Shqipërinë, Isabel Santos, nënvizoi rëndësinë e mbështetjes së medias së lirë dhe luftën kundër dezinformimit.
Gjithashtu, Kryetar i Delegacionit të Parlamentit Evropian, Manolis Kefaloiannis nënvizoi se Shqipëria duhet të bëjë më shumë për respektimin e të drejtave të pakicave, mbështetjen e lirinë e medias dhe transparencën e financimit dhe pronësisë së medias.
Komiteti Parlamentar i Stabilizim-Asociimit BE-Shqipëri u mblodh në takimin e 14-të, pas rreth 4 vitesh ndërprerjeje. Ndërkohë, ditën e nesërme në datën 24 shkurt do të mbahet sesioni i dytë. Sesioni u drejtua nga Manolis Kefalogiannis, Kryetar i Delegacionit të Parlamentit Evropian dhe Taulant Balla, Kryetar i Delegacionit të Kuvendit të Shqipërisë në Parlamentit Evropian. Në mbledhje, përveç anëtarëve të Komitetit nga Parlamenti Evropian dhe Kuvendi i Shqipërisë, mori pjesë dhe përshëndeti edhe Kryetarja e Kuvendit, znj. Lindita Nikolla, Ministrja për Evropën dhe Punët e Jashtme, znj. Olta Xhaçka, dhe Ambasadori i BE-së në Shqipëri, z. Luigi Soreca.
Së fundmi, në mbledhje diskutuan edhe anëtarët e delegacionit të Kuvendit, deputetët Alfred Rrushaj, Toni Gogu, Enkelejd Alibeaj, Famtir Xhafa, Enslemvera Zake, Jorida Tabaku, Ina Zhupa, të cilët prezantuan këndvështrimet dhe vlerësimet e tyre për ecurinë e reformave integruese dhe reformat e tjera në vend.
Discussion about this post