Komiteti Olimpik Shqiptar ka organizuar ditën e sotme aktivitete sportive për afganët në mënyrë që edhe fëmijët të harrojnë situatat e dhunshme para ardhjes në Shqipëri dhe të ndihen si në shtëpi. Afganët u emocionuan dhe mbetën të kënaqur nga mikpritja që po u bëhet. Presidenti i Komitetit Olimpik u shpreh se ky nuk do të jetë i vetmi aktivitet i organizuar dhe se do bëhet çdo gjë që fëmijët afganë të ndihen si në shtëpi dhe të sigurt.
“Në këtë ditë olimpike, është ditë e solidaritetit, miqësisë dhe respektit, jemi këtu për të vënë në pah pikërisht këto vlera. Duam t’iu heqim dhimbjet që keni. Shumë emocionuese dhe nuk është dita e fundit pasi do bëjmë dhe ditë të tjera këtu në Golem. Ju falënderoj dhe shqiptarët kanë qenë gjithmonë mikpritës”-tha ai.
Për fëmijët ishin përgatitur lojëra të ndryshme si hedhje me litar apo vrapime e të tjera. Emocione të forta pati dhe këndimi i himni afgan i cili përloti të pranishmit.
Disa nga afganët thanë se ndihen si në shtëpinë e tyre dhe shprehën shumë mirënjohje për organizatorët.
“E shijuam shumë, sidomos fëmijët. Sot u ndjemë si në shtëpi, jemi shumë mirënjohës. Ishte e mrekullueshme, mundësi për të ndarë ndryshimet tona, kulturat tona, të ndihemi në paqe duke luajtur. Janë lotët që më kujtojnë vendin tim, shpresoj që një ditë në atdheun tonë të rikthehet paqja dhe siguria”
Kujtojmë se në Shqipëri kanë mbërritur 644 afganë dhe janë strehuar nëpër struktura hoteliere në Durrës dhe Shëngjin.
