Burimi i Sinecit në fshatin Lumas të Kuçovës është shndërruar në mollë sherri mes banoreve dhe firmës Salillari, e cila muaj më parë ka nisur të kryejë punime në zonë, duke i prezantuar ato si zbatim të një projekti për ndërtimin e një ujësjellësi. Banorët dolën në protestë ditën e sotme duke bllokuar sipas tyre, përpjekjet e firmës për zhdukjen e provave.
Banorët pretendojnë se skenarë të tjerë fshihen pas këtij projekti, pasi uji në fshat nuk mungon. Pasi çështja u kallëzua në SPAK prej tyre, puna u pezullua në pritje të ekspertëve. Banoret thonë se firma po heq tubat e vendosur përgjatë këtyre muajve me qellim që të zhdukë provat e punimeve në burimin e Sinecit përpara se në zonë të mbërrijnë inspektoret e SPAK.
‘Mos të shkulen tubet, ta shikojnë shtrimin. Pse i fshehin tubat, se ata i vunë, kanë frikë nga ekspertët nga provat. Ne me këtë mbajmë shpirtin, me këtë ujë. Tani nuk do të ketë më asgjë.’– shprehen banorët.
Avokati i banorëve, Arben Llangozi thotë se aferat korruptive në burimin e Sinecit janë denoncuar tashmë në SPAK dhe ky fakt ka shqetësuar firmën Salillari.
