Një ngjarje e rëndë dhe e përsëritur në skemat e tenderave publikë ka ndodhur brenda ambienteve të Akademisë së Sigurisë, ku 56 studentë dhe kursantë janë helmuar masivisht. Ajo që duhej të ishte një shërbim elitar për forcat e ardhshme të rendit, është kthyer në një skandal shëndetësor me prapavijë financiare miliona eurosh.
Studentët shfaqën simptoma si të përziera, dhimbje barku dhe të vjella, ndërsa u transportuan me urgjencë për ndihmë mjekësore. Pas trajtimit në spital, ata janë larguar jashtë rrezikut për jetën. Sipas të dhënave paraprake, ushqimi për studentët furnizohej nga kompania private “SORI-AL”, e cila kishte kontratë për shpërndarjen e tre vakteve ushqimore në ditë në Akademinë e Sigurisë. Pas incidentit, autoritetet nisën menjëherë hetimet dhe morën mostra ushqimore për analiza laboratorike me qëllim verifikimin e pranisë së kontaminimit apo shkeljeve të standardeve të sigurisë ushqimore.
“SORI-AL” është një kompani kateringu e themeluar në vitin 2003 dhe në pronësi të biznesmenes Alma Tafani, ish-bashkëshortja e kreut të Dhomës së Tregtisë, Nikolin Jaka. Kompania operon prej më shumë se dy dekadash në sektorin e furnizimit me ushqim për institucione shtetërore dhe private, ndërsa emri i saj është përmendur shpesh në lidhje me tenderë publikë me vlera të larta financiare. Sipas të dhënave të kontratës, “SORI-AL” është angazhuar për furnizimin me katering të studentëve të Akademisë së Sigurisë që prej 9 shtatorit 2025. Më 21 prill 2026, në kuadër të kësaj kontrate, rezulton të jetë kryer një pagesë prej 78 milionë lekësh për shërbimin e ushqimit. Pas helmimit të studentëve, kompania është vënë në qendër të hetimeve për dyshime mbi mënyrën e ruajtjes, përgatitjes dhe shpërndarjes së vakteve ushqimore.
Në lidhje me ngjarjen, Komisariati nr. 1 arrestoi kuzhinierin Kujtim Ballgjini, 52 vjeç, dhe teknologen Kristjana Plaka, 23 vjeçe, të dy punonjës të kompanisë që merrej me shpërndarjen e ushqimit në Akademi. Ndërkohë, administratorja dhe pronarja e kompanisë, Alma Tafani, është shpallur në kërkim nga policia. Në ambientet e Akademisë kanë zhvilluar kontrolle specialistë të Institutit të Shëndetit Publik, Agjencisë Kombëtare të Ushqimit dhe strukturave të krimit ekonomik, të cilët kanë intervistuar studentët dhe kanë marrë mostra për ekzaminime laboratorike. Rezultatet e analizave pritet të përcaktojnë nëse helmimi është shkaktuar nga ushqimi i kontaminuar dhe nëse do të ketë përgjegjësi të tjera penale për personat e përfshirë në këtë skandal.
Tenderi 3.5 milionë euro dhe kompania “Sori-Al”
Burime zyrtare dhe dokumentet e prokurimit bëjnë me dije se kompania përgjegjëse për ushqimin është “Sori-Al” SHPK. Kjo kompani rezulton në regjistrat e biznesit në emër të Alma Tafanit, bashkëshortes së Nikolin Jakës, emri i të cilit qëndron pas këtij biznesi që ka shtrirë “tentakulat” në kateringun e institucioneve shtetërore.
Vetëm pak kohë më parë, kjo kompani ka përfituar një kontratë majme me vlerë 276 milionë lekë (pa TVSH). Kur kësaj shifre i shtohet edhe TVSH-ja, vlera që paguhet nga paratë e shqiptarëve shkon në rreth 3.5 milionë euro. Përkundrejt kësaj shifre galopante, studentët e policisë janë ushqyer me produkte që i kanë dërguar drejt shtretërve të spitalit me serume, të vjella dhe dhimbje të tmerrshme barku.
Arrestimet dhe administratorja në kërkim
Pasojat e kësaj papërgjegjshmërie kanë çuar në veprimin e menjëhershëm të Policisë së Shtetit (Komisariati nr. 1), e cila:
- Ka arrestuar teknologun dhe kuzhinierin e kompanisë “Sori-Al”.
- Ka shpallur në kërkim administratoren Alma Tafani.
Faktet tronditëse të skandalit:
- Helmimi: 56 studentë përfunduan në spital menjëherë pas konsumimit të drekës.
- Kontrata: 3.5 milionë euro për 3 vjet shërbim (gatim dhe shpërndarje ushqimi).
- Përgjegjësit: Ndërsa stafi teknik është në pranga, gishti i akuzës drejtohet nga pronarët realë, Nikolin Jaka dhe Alma Tafani, të cilët akuzohen për neglizhencë kriminale në këmbim të fitimit.
Ky skandal nxjerr zbuluar dështimin e institucioneve për të monitoruar kontratat miliona eurosh. Si mundet që në një institucion të sigurisë së lartë, ushqimi të kthehet në mjet helmimi? Pyetja që shtrohet tashmë është nëse drejtësia do të shkojë deri te “kokat” e këtij tenderi, apo përgjegjësia do të mbetet vetëm te stafi i kuzhinës.
Discussion about this post