Qeveria ka dështuar me projektin për ndërtimin e aeroportit të Sarandës, pasi asnjë kompani në vend nuk ka shfaqur interes për këtë tender. Prandaj, Ministria e Infrastrukturës dhe Energjisë ka anuluar për herë të dytë garën e partneritetit publik-privat. Nuk dihen arsyet pse kompanitë refuzojnë të marrin përsipër këtë tender, por duket qartë që i kanë vendosur bojkot këtij projekti. Kujtojmë se, gara për dhënien me koncesion të aeroportit të Sarandës u hap në fillim të muajit gusht, ndërkohë që në përpjekje për të siguruar oferta të vlefshme, Ministria e Infrastrukturës dhe Energjisë ndryshoi 2 herë kriteret dhe afatin e dorëzimit të ofertave, duke e zgjatur deri në datën 14 tetor, nga 23 shtatori që ishte fillimisht.
Gjithashtu, ajo u rihap në datën 26 tetori, teksa kompanitë kishin një muaj kohë për dorëzimin e dokumenteve. Por, pavarësisht këtyre ndryshimeve duket se asnjë investitor nuk ka paraqitur interes për të nënshkruar një kontratë 35-vjeçare, me një vlerë të parashikuar investimit prej 34.32 mln euro.
Ky investim do të duhej të kryhej nga kompania që do të shpallej fituese në garë, ndërkohë që pas projektimit, ndërtimit, operimit dhe mirëmbajtjes, në përfundim të periudhës 35-vjeçare do të bëhej transferimi i veprës aeroportule pranë organeve shtetërore.
Discussion about this post