SPAK ka zyrtarizuar akuzën ndaj zv/kryeministres Belinda Balluku, ndërsa paralelisht ka kërkuar autorizim për arrestimin e saj, në kuadër të hetimeve për procedurën e prokurimit të “Ndërtimit të Unazës së Jashtme të Tiranës, Loti 4”.
Në dosjen hetimore përfshihet edhe dëshmia e biznesmenit Ilir Shtufi, përfaqësues i shoqërisë “Nova Construction 2012” sh.p.k., si dhe përmendet ish-kreu i Autoritetit Rrugor Shqiptar, Evis Berberi.
Në dëshminë e dhënë më 8 dhjetor 2025, Ilir Shtufi shpjegon rrethanat e bashkëpunimit me shoqëritë e tjera në tender. Ai deklaron se fillimisht kishte hezitime për bashkëpunimin me “Euroteorema Peqin”, pasi kjo shoqëri kërkonte mazhorancën e punimeve. Sipas tij, gjatë kësaj periudhe u njoftua nga një inxhinier i kompanisë së tij se Evis Berberi kishte kërkuar disa herë ta takonte.
Shtufi pohon se pranoi takimin, duke qenë se Berberi ishte titullari i autoritetit kontraktor për tenderin ku kompania e tij synonte të konkurronte. Pas këtij takimi, sipas dëshmisë, ai vendosi të bashkëpunonte me “Euroteorema Peqin”.
Nga aktet e hetimit rezulton gjithashtu se Belinda Balluku, në cilësinë e Ministres së Infrastrukturës dhe Energjisë, ka ndjekur dhe orientuar në vijimësi procedurën e prokurimit të zhvilluar nga ARRSH, institucion në varësi të ministrisë që ajo drejtonte, si në fazën përgatitore ashtu edhe gjatë zhvillimit të procedurës.
Sipas aktit të ekspertimit informatik të datës 26.09.2024, nga celulari “Blackberry” i sekuestruar ish-drejtorit të ARRSH-së, Evis Berberi, janë nxjerrë mesazhe që dokumentojnë komunikime të drejtpërdrejta ndërmjet Ballukut, Berberit dhe Shtufit, në prag të procedurave të tenderimit për Lotin 4.
Më datë 10 shtator 2021, Balluku i shkruan Berberit:
“Hajde tek une ne 11”, vijuar nga udhëzime për t’i bërë të qartë një operatori se “Punet i ke me gimin thuaj jo me mua”.
Menjëherë pas kësaj bisede, Evis Berberi komunikon me Ilir Shtufin, i cili i shkruan:
“persh si ke kan.. ilir shufi nova jam. te tak pak mkan then kure mundesh”.
Takimi, sipas mesazheve, është realizuar brenda ditës.
Pas takimit me Shtufin, Berberi njofton Ballukun me mesazhin:
“E takova ok”.
Në materialin hetimor pasqyrohet gjithashtu se, përpara se të mbyllej afati i ofertave, shoqëria “Nova Construction 2021”, e lidhur në komunikim me Shtufin, kishte formalizuar marrëveshje bashkëpunimi me dy kompani të tjera për të marrë pjesë në garë, ku më pas rezultuan shpallur fituesit e procedurës.
Përfshirja e Ilir Shtufit në këto komunikime e zhvendos dosjen nga një hetim i thjeshtë administrativ, në një skemë të dyshuar ndërveprimesh mes segmenteve politike, zyrtarëve të lartë dhe biznesmenëve të afërt me opozitën e kohës, duke shtruar pikëpyetje të reja mbi ndikimin real në procesin e tenderimit të një prej projekteve më të mëdha rrugore në vend.
Prokuroria pritet të sqarojë rolin e secilit prej personazheve të përmendur, ndërsa dosja e Ballukut është kthyer tashmë në një prej çështjeve më të ndjeshme politike dhe penale të vitit.
gijotina.com/
Discussion about this post