Kozma Dushi ka lënë në harresë vuajtjet e shumë artitëve që janë futur në burg gjatë kohës së komunizmit. Në një intervistë për News24 nga koncerti ku u interpretuan këngë të para ‘90-ës e pas ‘90-ës duke reflektuar edhe raportin tonë të vështirë me të shkuarën, Dushi flet për kohë të arta, edhe pse shumë kolegë të tijët u arrestuan e internuan.
“Nuk ishin kohë të veshtira. Ishin kohë të arta. Artistët mbaheshin në pëllëmbë të dorës, ju hapeshin dyert,”- thotë Dushi.
Kur gazetarja Fatmira Nikolli e vë përballë faktit që ju mbylleshin dyert e burgut Dushi shton: Nëse ti bëje gabime, çdo shtet ka ligje. Mos bëj gabime. Pse të bësh gabime? Pse nuk u futa unë ne burg? Pse nuk u fut Tonin Tershana? Pse nuk u fut Vaçe Zela, Luan Zhegu? Më vjen keq. Nuk gjykohet kështu.
Koncerti i mbajtur në teatrin veror te liqeni, bashkoi në skenë këngë të njohura të riorkestruara dhe këngë të reja nga artistë të ndryshëm nën titullin “Me muzikën flasim”.
Rovena Dilo erdhi në skenë me “Ante” dhe këngën e saj më të re. Ndërsa Orgesa Zaimi, pos këngës së saj, “Verën ku ma le”, interpretoi edhe një këngë të Anita Bitrit.
“Unë kam disa këngë të miat,por kam vënë re që publiku i do këngët e vjetra të muzikës së lehtë shqiptare”, tha ajo.
Emra të njohur të këngës u ngjitën në skenë, nga Liljana Kondakçi te Kozma Dushi, duke risjellë këngët më të njohura të kohëve të tyre të arta, që u krijuan në kohë të errëta. Organizatori i koncertit, Ilir Çumani tha se është përzgjedhur një repertor që nuk ka këngë të propagandës.
