Ilir Beqaj, ish-ministër i Shëndetësisë, është paraqitur në SPAK, bazuar në vendimin e GJKKO-së, ku përcakton se çdo të premte në orën 15:30 ai duhet të paraqitet para oficerit të Policisë Gjyqësore. Beqaj ka qëndruar vetëm 10 minuta, siç duket një procedurë rutinë, në zbatim të vendimit të GJKKO.
Beqaj është vendosur nën hetim për koncensionin e sterilizimit. Ndaj Beqajt janë vendosur dy masa sigurie: detyrim paraqitje dhe ndalim të daljes nga vendi.
Hetimi ndaj Beqajt vazhdonte prej tre vitesh për veprat penale “Shpërdorimi i detyrës” në bashkëpunim, “Shkelja e barazisë së pjesëmarrje në tendera apo ankande publike” kryer në bashkëpunim, si dhe “Korrupsioni pasiv i funksionarëve të lartë shtetëror ose i të zgjedhurve vendorë”. Për llogari të këtij hetimi, në 17 gusht të këtij viti, u arrestua ish-zëvendës ministrin i Shëndetësisë Klodian Rrjepaj dhe biznesmeni Ilir Rrapaj, fitues i koncesionit të sterilizimit.
Sipas gjyqtarit të GJKKO-së, Erion Bani, ish-ministri Ilir Beqaj ka konsumuar edhe veprën penale të falsifikimit të vulave, stampave dhe formularëve, duke evidentuar se këto vepra parashikojnë dënimin deri në 7 vite burg.
Sipas Gjykatës, Beqaj rezulton personi kyç në kryerjen e procedurave dhe nuk lë pa përmendur duke cituar bazën ligjore përkatëse, se për këto vepra lënia me masë sigurie më të butë se “Arresti në burg”rrezikon prishjen e hetimeve apo shmangien e ballafaqimit me drejtësinë.
Discussion about this post