Lindita Nikolla duket se njeh Gazment Bardhin si kryetarin e Grupit Parlamentar të PD-së. Kjo pasi Bardhi është ftuar të marrë pjesë në mbledhjen e Konferencës së Kryetarëve që pritet të mbahet sot në orën 14.30.
Në seancën e fundit parlamentare, Lulzim Basha dorëzoi një kërkesë në Kuvend, përmes të cilës autorizonte Flutura Açkën si drejtuesen e Grupit Parlamentar të PD-së.
Njoftimi u bë publik nga Lindita Nikolla, Kryetare e Kuvendit, dhe shkaktoi reagime në rradhët e opozitës.
Por duket se në mbledhjen e Konferencës së Kryetarëve ku të pranishëm janë kryetarët e grupeve parlamentare dhe kryetarët e Komisioneve Parlamentare, Nikolla ka vendosur të thërrasë Gazment Bardhin. Kjo do të thotë se administrata e Kuvendit, të cilës Nikolla i kërkoi ndihmë për të interpretuar Rregulloren e Kuvendit, duket se ka legjitimuar Gazment Bardhin si drejtues të Grupit Parlamentar të PD-së.
Gjithashtu e pranishme në mbledhjen e Konferencës së Kryetarëve pritet të jetë edhe Flutura Açka, e cila drejton Komisionin Parlamentar të Medias, deri në miratimin e dorëheqjes që ka paraqitur.
Discussion about this post