Sot në orën 09:00 do të mblidhet Konferenca e Kryetarëve, e cila pritet të shqyrtojë kërkesën e Grupit Parlamentar të Partisë Demokratike për zhvillimin e një mocioni me debat lidhur me ish-kreun e Shërbimit Informativ të Shtetit, Vlora Hysenin.
Në kërkesën e depozituar në Kuvend, PD kërkon shqyrtimin e përgjegjësive institucionale që lidhen me emërimin, ushtrimin e detyrës, mbikëqyrjen dhe largimin e Hysenit nga drejtimi i SHISH. Demokratët kërkojnë gjithashtu informacion mbi masat e marra për mbrojtjen e informacionit të klasifikuar.
Në dokument përmenden informacionet e bëra publike lidhur me pretendimet se Hyseni, gjatë kohës që drejtonte SHISH, ka ndihmuar Ergys Agasin përmes furnizimit me të dhëna dhe informacione të klasifikuara. Agasi është nën hetim nga Prokuroria e Posaçme për disa vepra penale.
Në këtë kuadër, PD kërkon që Kuvendi të shqyrtojë procedurat dhe kriteret e ndjekura për përzgjedhjen dhe emërimin e Hysenit, përgjegjësitë e institucioneve të përfshira në këtë proces, si dhe funksionimin e mekanizmave të kontrollit, mbikëqyrjes dhe llogaridhënies gjatë ushtrimit të detyrës.
Një tjetër pikë e kërkesës lidhet me verifikimet për të përcaktuar nëse dhe në çfarë mase mund të jetë komprometuar informacioni i klasifikuar. Demokratët kërkojnë gjithashtu të bëhen të ditura masat e marra për garantimin e sigurisë së informacionit dhe mbrojtjen e personelit të SHISH.
Në dokument kërkohet edhe shqyrtimi i përgjegjësisë institucionale dhe politike të Kryeministrit dhe strukturave përkatëse shtetërore në procesin e përzgjedhjes, emërimit, mbikëqyrjes dhe largimit të drejtorit të SHISH.
Sipas PD-së, çështja ka rëndësi për ushtrimin e kontrollit parlamentar mbi institucionet e sigurisë kombëtare, ndaj kërkohet transparencë dhe llogaridhënie për mënyrën se si kanë funksionuar mekanizmat e verifikimit dhe mbikëqyrjes.
Në përfundim, Grupi Parlamentar i Partisë Demokratike kërkon që Konferenca e Kryetarëve të përcaktojë datën për zhvillimin e mocionit me debat në seancë plenare. Në kërkesë nënvizohet se shqyrtimi parlamentar duhet të zhvillohet duke respektuar pavarësinë e organeve të drejtësisë, prezumimin e pafajësisë dhe rregullat për mbrojtjen e informacionit të klasifikuar.
Discussion about this post