Italia dhe Argjentina do të përballen vitin e ardhshëm më 1 qershor në stadiumin “Wembley” të Londrës. Lajmin e bëri të ditur UEFA dhe homologu amerikano-jugor CONMEBOL.
Loja, e titulluar “Finalissima”, u ra dakord në shtator, menjëherë pasi UEFA dhe CONMEBOL kundërshtuan ashpër planet e FIFA-s për një Kupë Bote çdo dy vite.
“Ekziston një traditë e gjatë bashkëpunimi midis UEFA-s dhe CONMEBOL-it, siç mund të dëshmohet ndër vite me gara të tilla si Trofeu “Artemio Franchi” dhe Kupa Ndërkontinentale. Është me krenari të madhe që po rilançojmë një trofe kaq prestigjioz për ekipet kombëtare për kënaqësinë e dashamirëve të futbollit anembanë globit”, tha në një deklaratë presidenti i UEFA-s, Aleksander Ceferin.
Të dyja skuadrat tronditën skuadrën vendase në finale pasi Italia mundi Anglinë në “Wembley” në korrik, ndërsa Argjentina i dha fund një mungese 28-vjeçare të trofeut kur mposhti Brazilin në “Maracana”.
Konfederatat kanë nënshkruar gjithashtu një Memorandum të zgjeruar mirëkuptimi që zgjat deri më 30 qershor 2028 dhe ato do të ndajnë një zyrë në Londër vitin e ardhshëm.
Discussion about this post