Kostoja totale për financimin e strategjive që do të mbështesin procesin e anëtarësimit të Shqipërisë në Bashkimin Europian deri në vitin 2028 vlerësohet në rreth 7.6 miliardë euro.
Të dhënat mbi kostot për periudhën 2026–2028 janë publikuar në Fletoren Zyrtare në vendimin “Për miratimin e dokumentit të politikave prioritare 2026–2028”.
Sipas këtij dokumenti, fondet e nevojshme për financimin e aktiviteteve dhe masave specifike të strategjive, të cilat do të kontribuojnë drejtpërdrejt në realizimin e objektivave strategjikë dhe specifikë, arrijnë në rreth 750 miliardë lekë ose 7.63 miliardë euro.
Dokumenti i Politikave Prioritare 2026–2028 përcakton drejtimet kryesore të politikës shtetërore dhe shërben si një nga elementet kryesore të planifikimit strategjik të integruar. Në vendim theksohet se ky dokument do të orientojë hartimin e buxhetit afatmesëm dhe alokimin e burimeve financiare, duke u fokusuar në përmbushjen e prioriteteve të përcaktuara.
Ndërkohë, disbursimi i mbështetjes nga Bashkimi Europian, në kuadër të “Vendimit zbatues të Komisionit Europian për miratimin e Agjendave të Reformës dhe programit shumëvjeçar të punës për Facilitetin e Reformave dhe Rritjes në Ballkanin Perëndimor”, do të varet nga përparimi konkret në zbatimin e reformave të përcaktuara. Ky vendim u miratua nga Komisioni Europian më 23 shtator 2024.
Përveç kësaj, stabiliteti makrofinanciar, menaxhimi i qëndrueshëm i financave publike, transparenca dhe mbikëqyrja e buxhetit janë kushte të përgjithshme që duhet të përmbushen për të siguruar pagesat dhe çlirimin e fondeve.
Në periudhën 2024–2027, Shqipëria pritet të përfitojë një fond total prej 922 milionë eurosh në formën e granteve dhe kredive, me kushtin e zbatimit të reformave kyçe të përcaktuara në Agjendën Kombëtare të Reformave. Alokimet financiare do të mbështesin sektorë të rëndësishëm si përmirësimi i klimës së biznesit, zhvillimi i kapitalit njerëzor, avancimi i aftësive dixhitale, energjia dhe tranzicioni i gjelbër, si dhe forcimi i shtetit të së drejtës.
Discussion about this post