Kryeministri Albin Kurti ka reaguar pas aksioneve të policisë në veri të Kosovës, të cilat kanë rezultuar me konfiskim të një sasie të konsiderueshme të armatimit e të mjeteve ushtarake..
Përmes një postimi në platformën “X”, Kurti shkruan se thirrjet për inspektim vijnë nga qytetarët, ndërsa ka theksuar se siguria e njerëzve dhe e vendit mbeten prioritet kyç për qeverinë.
“Policia jonë gjatë tre ditëve të fundit ka konfiskuar një sasi të konsiderueshme armatimi, siç shihet në foto, ku përfshihen armë dhe granata në veri të vendit. Thirrjet për inspektim vijnë nga qytetarët e thjeshtë që alarmojnë policinë. Siguria e njerëzve dhe siguria e të gjithë vendit mbeten një prioritet kyç për qeverinë tonë, veçanërisht kur përballemi me kërcënime të tilla të afërta për sigurinë tonë kolektive”, shkruan Kurti.
Ndërkaq, ditën e djeshme Policia e Kosovës kreu kontrolle në fshatin Grabovc të Zveçanit ku kanë gjetur armë, municion dhe mjete shpërthyese.
“Më datën 22.11.2024, pas pranimit të një informate mbi dyshimet për armë dhe municion, njësitet policore kanë ndërmarrë veprimet e menjëhershme ku kanë kryer një kontroll në fshatin Grabovc të Zveçanit. Kontrolli është realizuar në një shtëpi dhe në një objekt përcjellës të saj. Gjatë kontrolli janë gjetur armë, municion dhe mjete shpërthyese”, thuhet në njoftim.
Dëshmitë të cilat janë gjetur dhe janë konfiskuar janë:
- dy mjete shpërthyese (granata dore) M-52,
- dy armë AK-47,
- një pushkë M-48 (karabinë)
- 86 copë fishekë të armës AK-47,
- 35 copë fishekë të armës M-48,
- 3 karikatorë të armës AK-47
Në lidhje me rastin është arrestuar personi (D.R) viti i lindjes 1968 i cili është shoqëruar në stacioni policor dhe i njëjti është intervistuar në prezencën avokatit mbrojtës.
“Të gjitha veprimet e ndërmarra i janë paraqitur prokurorit të rastit, ku pas intervistimit, me aktvendim të prokurorit i dyshuari dërgohet ne mbajtje për 48 orë. Duke falënderuar qytetarët për bashkëpunimin, Policia vazhdon të mbetet e përkushtuar për ofrim të shërbimeve ndaj të gjithë komunitetit pa dallim”, theksohet në njoftimin e policisë.
Discussion about this post