Viktor Imeri, një nga personat e konsideruar si i forti i Vlorës dhe në qytet njihet me nofkën “Tori i Xhihanes”, ka kërkuar të dalë nga rregjimi i burgimit “41 biss”.
Në mesditën e sotme, është mbajtur dhe seanca për rishikimin këti vendimi të ndërmarrë ndaj Imerit, por gjyqi është shoqëruar me debate të forta.
Imeri, ka kundërshtuar para gjyqtares së posaçme Flojera Davidhi, vendimin e komisionit të SPAK, që mban në këtë rregjim izolimi, të akuzuarin për vrasjen e Vajdin Lames dhe Artan Arsit, ngjarje kjo e ndodhur në 26 Shkurt 2005 në Tiranë.
“Nuk e kuptoj arsyen përse SPAK më ka futur në 41 biss dhe përse trajtohem ndryshe nga të dënuarit e tjerë. Kam tërë jetën burgjeve dhe më duket sikur nuk kam qenë ndonjëherë i lirë. Ato pak muaj qe më nxorën jashtë burgut, më bënë shumë keq se m’u vërsul i gjithë shteti mbi shpinë. Derisa më gjetën një pretekst, për të më futur prapë në burg. Më mirë mos të kisha dalë fare se nëse nuk do kisha dalë nuk do isha në këtë proces,”- është shprehur Imeri në seancën e mbajtur me dyer të mbyllura.
Debati mes tij, prokurorit të çështjes dhe gjyqtares Flojera Davidhi, është shoqëruar me fjalë fyese nga ana e të arrestuarit Imeri, situatë e cila detyroi gjyqtaren të urdhërojë policinë e burgjeve, që të nxirte nga ambjentet e gjykatës të arrestuarin.
Viktor Imeri u arrestua në 8 dhjetor 2020 në Tiranë, teksa ishte paraqitur në Policinë e Shtetit për tu njohur me një urdhër që i ndalonte antij daljen jashtë qarkut të Vlorës. Së bashku me Imerin, SPAK, lëshoi dhe 5 urdhëra të tjera arresti, si Lulzim Berisha, Indrit Taullai, Emiljano Shullazi, Plaurent Dervishi, Luftar Reçi dhe Indrit Rusi.
Imeri është kushëriri i “faqedjegurit”, Edison Harizaj, që u vra në Durrës në një atentat mafioz të ndodhur në vitin 2018.
Imeri u dënua me burg të përjetshëm për vrasjen e Arben Pajës dhe Ilir Xhungës. Që nga viti 1999 ai qëndroi në burgun e Lushnjës dhe Peqinit, deri kur nisi projektimin e tij për lirinë, gjë që e arriti dhjetorin e vitit 2019. Por, një vit më vonë, në dhjetor të vitit 2020, ai u rikthye në qeli pas hapjes së dosjeve të bujshme të vrasjeve të Klodian Saliut, Vajdin Lames dhe Artan Arsit./Elton Qyno/
Discussion about this post