Fatmir Mediu ka depozituar në Kuvend një projekt-rezolutë për gjendjen e krijuar në Ballkan, nisur nga situata në Bosnje, përmes të cilës ai kërkon që të merren hapa për rritjen e sigurisë. Lajmin e bëri të ditur vete Mediu sot përmes një deklarate publike, nga ku iu kërkoi palëve politike që të paktën për këtë rast, të bien në një mendje dhe kërkesat e tij të votohen si nga mazhoranca dhe nga opozita. “Kemi menduar të paraqesim në Kuvend një rezolutë të cilën do të diskutojmë me të gjitha partitë që të arrijmë në një rezolutë të plotë për të njësuar një qëndrim mbarë-shqiptar në raport me zhvillimet në Ballkan. Është një situatë shqetësuese. Duhet të konsultohemi me partnerët”, ka thënë ndër të tjera Mediu.
Sipas Mediut, ndikimi rus dhe serb në rajon po nxit konflikte, duke kërkuar që Shqipëria ta adresojë këtë edhe në NATO. Ai u shpreh më tej se për Shqipërinë nuk ka ndonjë rrezik, por duke marrë parasysh edhe situatën mes Serbisë dhe Kosovës, që agravoi tepër, Mediu thotë se është mirë që të merren masa.
“Duke i parë të ndërlidhura narrativat destabilizuese të Presidentit Vuçiç dhe zyrtarëve më të lartë të shtetit serb, me ndërhyrjet e hapura për të penguar anëtarësimin e Malit të Zi në NATO, me tentativat e Republika Srbska për të krijuar ushtrinë e saj, jashtë kontrollit kushtetues të Sarajevës, deklarimet për shkëputje nga BiH, situatën e paqëndrueshme politike në Maqedoninë e Veriut, si dhe me dislokimin e kohëve të fundit të ushtrisë serbe në kufi me Republikën e Kosovës, gjë që e shtyu Kryeministrin Kurti të paralajmëronte se rajoni po shkonte drejt një konflikti të armatosur”, tha Mediu.
Sakaq, bëhet me dije se përmes kësaj projekrezolute ai kërkon që të intensifikohet ndihma ndaj Kosovës për anëtarësimin e saj NATO. Po ashtu ai propozon edhe organizimin e një forumi ndërparlamentar me pjesëmarrjen e Shqipërisë, Mali të Zi, Kosovës dhe Maqedonisë së Veriu.
Discussion about this post