Edi Rama, Kryeministër dhe kryetar i PS-së, ka vendosur që kongresin e socialistëve ta mbajë më 8 dhjetor, ditën e Rinisë.
Në 8 dhjetor 1990, ka nisur në Qytetin Studenti protesta e të rinjve, që 3 ditë më pas çoi në krijimin e partisë së parë opozitare pas 45 vitesh diktaturë, Partisë Demokratike.
Për pothuajse 32 vite, 8 dhjetori është festuar nga demokratët si një moment që shënoi nisjen e lëvizjes studentore që çoi në rrëzimin e diktaturës. Por këtë vit, Edi Rama ka vendosur të zhvillojë Kongresin e PS-së, pasardhëse e PPSH-së, e cila nga Partia e Punës që drejtohej nga Enver Hoxha e më pas nga Ramiz Alia, u shndërrua në PS.
Duket se data e vendosur nga Rama për mbajtjen e Kongresit ka provokuar një reagim te demokratët e drejtuar nga Sali Berisha.
Sekretari për Diasporën i demokratëve, Indrit Hoxha, në një postim në rrjetin social shkruan se përveç simboleve, logos, tashmë Rama do t’i “gllabërojë” PD edhe 8 dhjetorin, e cila është dita e rinisë që shënoi fillimin e rrëzimit të diktaturës komuniste.
“Më 8 dhjetor Rama mbledh kongresin e PS. Përveç simboleve, logos, tashmë Rama do ti “gllabërojë” PD edhe 8 dhjetorin “Ditën e Rinisë”, që shënoi fillimin e rrëzimit te diktaturës komuniste!”, shkruan Hoxha.
Discussion about this post