Në 4 nëntor, Partia Socialiste do të mbledhë Kongresin e Jashtëzakonshëm, i cili do të nisë punimet në orën 11:00 në Pallatin e Kongreseve në Tiranë.
Në këtë kongres pritet të formalizohen vendimet e Asamblesë Kombëtare të mbajtur në shtator, atje ku Edi Rama prezantoi edhe kupolën e re drejtuese të PS-së, ose Sekretariatin.
E ndërsa në Asamble njoftoi largimin e Damian Gjiknurit si Sekretar i Përgjithshëm, funksion që ia besoi Blendi Klosit, pritet që delegatët e Kongresit të PS-së të miratojnë emrat e propozuar nga Rama dy muaj më parë në Asamble.
Blendi Klosi, i cili më parë ka mbajtur postin e Sekretarit Organizativ, ndërsa sot atë Sekretarit të Përgjithshëm, do të prezantojë para delegatëve platformën e tij për forcimin dhe organizimin e mazhorancës socialiste, si një parapërgatitje për vitin zgjedhor.
Organi më i lartë vendimmarrës i PS do të mblidhet sërish në fillim të verës së vitit të ardhshëm. Në kongresin e ardhshëm pritet që të zgjidhen edhe anëtarët e rinj në forumet drejtuese të PS-së.
Ndërkohë në Kongresin e 4 nëntorit, delegatët pritet të konfirmojnë në postet drejtuese të PS-së emrat e propozuar nga Rama si më poshtë:
Sekretar Organizativ Ardian Çela
Sekretar i Burimeve Njerëzore Eduart Ndreca
Sekretare e Gruas Evis Kushi
Sekretar Digjital Etjen Xhafa
Sekretare për Marrëdhëniet me Jashtë Romina Kuko
Sekretar për Çështjet Zgjedhore Eridjan Salianji
Discussion about this post