“Ashtu si Basha që bëri shpejt e shpejt një kongres për t’i vënë vulën asaj që kishte ngelur nga PD-ja, të njëjtën gjë po bën edhe Berisha”, kështu është shprehur deputeti Dashamir Shehi për situatën brenda PD-së.
Ai gjithashtu shprehet se ribashkimi është një proces shumë më i gjatë, për tu arritur.
“Lulzim Basha duhej të ishte tërhequr që pas datës 25. Bëri gabim dhe e futi partinë në këtë lloj sherri. Gabim tjetër ishte që nuk bëri kurrë një analizë politike, nuk u mor vesh kurrë pse i humbim zgjedhjet. Bëri një kongres shpejt e shpejt, për t’i vënë vulën asaj që kishte mbetur nga PD-ja. Të njëjtën gjë po bën edhe Berisha, ai po bën partinë e vet tani. Kongresin do ta bëjë në datë 30 prill dhe siç e shikoni, edhe Berisha ka ngutje të madhe”, deklaroi Shehi.
Ndër të tjera i ftuar në studion e “Ditarit” në A2 CNN, Shehi shprehet se në datën 30 prill do t’i vendosin një kësulë formale PD-së, por rezultati do të jetë i njëjtë me atë të viteve të shkuara.
“Këto gjysma zgjedhjesh që po bëjnë këta nëpër rrethe, janë e njëjta gjë që bënte Basha. Unë do t’i ftoja që të kenë durim, të shkojnë deri në fund të verës, të bëhen primaret në bazë dhe të shprehin njerëzit mendimet e tyre. Unë nuk e shikoj të këndshme situatën. Në datën 30 prill do t’i vendosin një kësulë formale PD-së, por rezultati do të jetë i njëjtë me atë të viteve të shkuara”, theksoi Dashamir Shehi.
Discussion about this post