Në përkujtimin e 24-vjetorit të masakrës së Rezallës në Skënderaj, kryetari i Kuvendit të Kosovës, Glauk Konjufca, deklaroi se në vend që Serbia të gjykohej për gjenocidin ndaj popullit shqiptar, sot është Kosova që ndodhet e ulur në bankat e drejtësisë.
Ai tha se e gjitha kjo nuk është asgjë tjetër, përveç padrejtësi.
“Kjo masakër së bashku me gjithë masakrat e kryera nga aparati shtetëror e ushtarak i Serbisë e përbëjnë gjenocidin që ky shtet e ka ushtruar mbi popullin e Kosovës”, tha kryekuvendari Konjufca.
Sipas tij, të vrarët e masakruarit po përkujtohen në kohën kur nuk është Serbia ajo që po gjykohet dhe ta marrë dënimin e merituar, me gjithë ata kriminelë lufte që i mban brenda.
‘Por është pikërisht Ushtria Çlirimtare e Kosovës dhe pjesëtarët e saj, vetë Kosova është e ulur në bankën e drejtësisë, dhe kjo nuk mund të përjetohet ndryshe veç si padrejtësi”, tha ai.
Konjufca foli edhe për kërkesën e Serbisë që të mos përdoret termi “persona të zhdukur me dhunë”, në marrëveshjen në mes të dyja vendeve.
“Informacioni im është që ky term do të përdoret në marrëveshje, pra termi ‘të zhdukurit’, siç përdoret nëpër konventa ndërkombëtare, sepse Serbia është munduar të përdorë terminologji të tjera për t’i ikur përgjegjësisë”.
Masakra e Rezallës konsiderohet si njëra ndër masakrat më të mëdha gjatë luftës në Kosovë.
Ndërkohë, deklarimi i Konjufcës sa i përket vendosjes së Kosovës në bankën e drejtësisë, bëhet në kohën kur në Dhomate Specializuara të Kosovës në hagë ka filluar procesi gjyqësor ndaj ish krerëve të UÇK-së, Hashim Thaçi, Kadri Veseli, Jakup Krasniqi e Rexhep Selimi./RTK/
Discussion about this post