Janë shpallur fituesit e Konkursit Ndërkombëtar “Hospitality Albania”, një nismë që, siç pretendon kryeministri Rama, synon transformimin e vilave qeveritare në Shkodër dhe Vlorë në destinacione ekskluzive të turizmit elitar.
Fituesit e këtij konkursi janë studio arkitekturore prestigjioze ndërkombëtare: “Saunders Architecture” për rezidencën në Shkodër dhe “Practica Arquitectura y Urbanismo SLP” për projektin në Vlorë.
Projekti i studios norvegjeze “Saunders Architecture” sjell një vizion të veçantë: ruajtjen e vilës ekzistuese, e cila do të transformohet në një hotel me rreth 30 dhoma.
“Ndërtesa nuk duhet të jetë si një kala, por të ftojë njerëzit të hyjnë dhe ta përjetojnë. Qasja jonë është që hoteli të ofrojë luks përmes përvojës, jo vetëm pamjes,” – u shpreh përfaqësuesi i studios.
Në Vlorë, ish-rezidenca e Enver Hoxhës do të shndërrohet në një qendër turistike me ndërtesa 8-10 katëshe, të lidhura përmes një pishine monumentale.
“Synojmë një arkitekturë që ofron privatësi, thjeshtësi dhe ndjesinë e rigjenerimit. Përveç hotelit, kemi propozuar ndërtimin e ‘shtëpive në pemë’, si pjesë e një qendre të kujdesit për shëndetin dhe mirëqenien,” deklaroi përfaqësuesi i studios “Practica Arquitectura y Urbanismo”.
Kryeministri Edi Rama më herët e cilësoi projektin si një model të ri zhvillimi, ku shteti bëhet partner i drejtpërdrejtë në sipërmarrje, bazuar në praktikat më të mira të Italisë dhe Spanjës.
“Po shikojmë praktikisht potencialin e madh që ka vënia në shfrytëzim e aseteve shtetërore për ta përfshirë publikun përmes shtetit si një palë e interesuar, duke ndryshuar praktikisht hap pas hapi edhe formulat e ndërveprimit me privatin, të cilat deri dje kanë qenë shumë bazike dhe të drejtpërdrejta dhe e kanë privuar shtetin nga shumë kapacitete për të krijuar të ardhura, kështu që, duke i bashkuar këto interesa dhe duke e vënë shtetin në rolin e një pronari të zakonshëm, si palë në sipërmarrje, ne po zhvillojmë një infrastrukturë të re, faktikisht financiare për shtetin, duke u bazuar tek modelet më të mira në Europë, që janë modele të simotrave të Agjencisë së Korporatës Shqiptare të Investimeve dhe që në Itali apo në Spanjë zotërojnë asete dhe marrin të ardhura jashtëzakonisht mbresëlënëse, të cilat vihen në dispozicion të interesit publik’, tha më parë Rama.
gijotina.com/
Discussion about this post