Një incident ka ndodhur ditën e djeshme në fshatin Vuno, ku gazetari dhe publicisti Arjan Konomi është përplasur me truprojat dhe forcat e policisë që shoqëronin kryeministrin Edi Rama. Konomi është banor i Vunoit dhe shpeshherë ai ankohet në rrjetet sociale për sjelljen e policisë së shtetit që gjobit qytetarët për parkimin e automjeteve të tyre.
Pikërisht ka qenë kjo arsyeja që ka çuar në një përplasje me kryeministrin Rama. Me anë të një reagimi në rrjetet sociale, Konomi ka treguar se si ka ndodhur e gjithë ngjarja. Ai thotë se në Vuno, kryeministri Edi Rama, kishte ndalur për të pirë kafe dhe se eskorta e tij kishte qëndruar në vendin ku ndalohet për qytetarët.
Më pas Konomi e ka filmuar me telefon këtë moment, ku më pas i janë “sulur” edhe truprojat e Ramës. Sipas rrëfimit që ai ka bërë në rrjetet sociale, Rama e ka thirrur për tu sqaruar, por është përballur me një sjellje agresive nga bashkëshortja e tij Linda Rama. Më pas Konomi thotë se është shoqëruar në komisariatin e policisë së Himarës ku është mbajtur disa orë.
“Gjithë Vunoi u zgjua sot me gjoba për makinat. Më vonë, pas orës 12:00, dola për të mbledhur fiq dhe, kur u ktheva, pashë familjen e kryeministrit dhe eskortën e tij. E gjithë eskorta kishte parkuar në zonën ku ndalohet parkimi, ndërsa policia rrinte aty. Unë nisa të bëja një video dhe i thashë policisë: Pse nuk e gjobitni edhe kryeministrin, siç keni gjobitur Vunoin para pak orësh? Në atë moment Rama më thirri dhe u afrova. Më tha: ‘Ulu’. I thashë: ‘Si do t’ia bëjmë ne për parkimin? Ky është shqetësimi im’. Nuk përdora fjalë ofenduese.
Ai më ftoi të ulesha, por nuk pati kohë, sepse zonja Linda Rama, me një arrogancë dhe histerizëm, më tha ta lija të qetë. Si një nëpërkë, m’u hodh në fyt, aq sa tronditi edhe djalin e saj me reagimin që pati. Unë mbeta dhe i thashë: ‘Po të jap disa fiq’. Por ajo m’u kthye duke më thënë: ‘E di ti se ku t’i fus ato fiq?’ Shyqyr që kisha mbledhur fiq, që janë të butë; imagjinoni sikur të kisha mbledhur dardha. Kur po mendoja këtë gjë, më hidhen nja katër bodyguardë, më rrëmbejnë telefonin, ndërsa Linda bërtiste në anën tjetër, në mes të fshatit. Videot m’i fshinë nga telefoni dhe më shoqëruan me një furgon policie, me ‘Shqiponjat’, në Komisariatin e Himarës”, tha Konomi.
Discussion about this post