Kapen 11 kilogramë kokainë në kontejnerin e bananeve në Portin e Durrësit. Sasia e drogës është sekuestruare nga policia, nga një aksion blic i koduar “Rada”. Sipas policisë kontejneri është në pronësi të kompanisë “Alba Exotic Fruit”. Nga kontrolli i imtësishëm në dy nga kontejnerët e ngarkuar me banane, që kishin ardhur nga Ekuadori, për llogari të kësaj firme, u gjetën 11 kg kokainë që ishte fshehur në pjesën fundore, te kapakët e motorëve frigoriferikë.
Përveç këtij rasti, rezultojnë dhe 4 raste të tjera të gjetjes së pakove me kokainë. Bëhet fjalë për kompaninë “Alba Exotic Fruits”, të cilës iu gjetën plot 4 herë brenda muajit korrik, pako me lëndë narkotike kokainë. Operacioni i parë u bë më datë 13 korrik të këtij viti dhe operacioni i fundit më 29 korrik, ku i gjetën gjithsej 25 kilogramë e 435 gramë kokainë. Përveç kësaj, “Alba Exotic Fruits” i është gjetur në kontejnerët me banane në Pire të Greqisë, 137 kilogramë kokainë, e cila më vonë u zëvendësua me oriz më GPS nga autoritetet greke. Në atë kohë, nga ky operacion u arrestuan shtetasit Altin Myslimhaka dhe Ardian Bega dhe u shpall në kërkim Gentina Malinid.
Përveç këtyre rasteve, përfshihen dhe katër operacione të tjera në Portin e Durrësit, duke nisur që nga 1 prilli i këtij viti e deri më 18 qershor, të cilët rezultuan në sekuestrimin e 928 kilogramë kokainë.
