Finalizohet operacioni policor i koduar “Border” në Dibër ku është goditur një rast kontrabande me bagëti të imëta dhe të trasha.
Bagëtitë silleshin nga Maqedonia e Veriut në drejtim të Shqipërisë, nëpërmjet kufirit të gjelbër, me qëllim tregtimin e tyre.
Në këtë operacion janë vënë në pranga 4 shtetas dhe është sekuestruar furgoni me të cilin transportoheshin bagëtitë dhe 64 krerë bagëti të pamatrikulluara.
Njoftimi
“Specialistët për Hetimin e Krimeve Ekonomiko-Financiare të Drejtorisë Vendore të Policisë Dibër, në bashkëpunim me Policinë Kufitare Bllatë dhe Prokurorinë Dibër, në vijim të punës për goditjen e aktivitetit të paligjshëm të kontrabandës me mallra, pas hetimit disamujor, mbështetur dhe në inteligjencën informative, kanë goditur një tjetër rast, në kuadër të operacionit policor të koduar “Border”. Si rezultat u bë kapja dhe arrestimi në flagrancë i shtetasve: D. E., 30 vjeç, A. D., 34 vjeç, B. Z., 27 vjeç dhe N. Z., 34 vjeç, banues në Dibër. Këta shtetas, në bashkëpunim me njëri-tjetrin, pasi siguronin bagëtitë e imëta dhe të trasha, në Maqedoninë e Veriut, i kalonin ato në drejtim të Shqipërisë, nëpërmjet kufirit të gjelbër, në Bllatë, i mbanin fillimisht në stallat e tyre dhe më pas i shisnin kundrejt shumave të ndryshme monetare”, njofton policia.
“Gjatë kontrollit të ushtruar në stallat në pronësi të këtyre shtetasve, u gjetën 64 krerë bagëti të imëta dhe të trasha, të pamatrikulluara, të dyshuara të kontrabanduara. Vijon puna për identifikimin e personave të tjerë të implikuar në këtë veprimtari të kundërligjshme. Materialet i kaluan Prokurorisë pranë Gjykatës së Shkallës së Parë Dibër, për veprime të mëtejshme”, thuhet më rej në njoftim.
Discussion about this post