Katër persona, 2 prej tyre me detyrë doganier në portin e Durrësit janë arrestuar nga policia.
Mësohet se të arrestuarit janë Granit Kerxhaliu, 35 vjeç, banues në Kukës dhe Behar Lleshi., 57 vjeç, lindur në Kosovë dhe banues në Londër. Po ashtu në pranga kanë rënë Artan Topuzi, 58 vjeç dhe Enkel Sheh, 52 vjeç, me detyrë doganier, të dy banues në Durrës.
Ndaj tyre rëndojnë akuza për veprat penale “Kontrabanda me mallra të tjera”, “Kontrabanda me mallra të licencuara” dhe “Tregtimi dhe transportimi i mallrave që janë kontrabandë”.
Policia ka ndaluar në lagjen nr.13, Durrës, një mjet furgon tip “Mercedes Benz”, me drejtues Granit Kerxhaliu dhe pronar Behar Lleshi Gjatë, pas kontrollit në këtë mjet janë gjetur dhe sekuestruar në cilësinë e provës materiale një sasi medikamentesh të ndryshme mjekësore, kamera sigurie dhe Rapid Test Antigen, pa dokumentacionin përkatës.
Ndërkohë dy doganierët akuzohen se kanë shpërdoruar detyrën duke mos kryer kontrollin e imtësishëm të mjetit ku u gjetën mallrat kontrabandë.
Pritet që personat në fjalë të përballen me akuzën për veprat penale, “Kontrabanda me mallra të licencuara” dhe “Tregtimi dhe transportimi i mallrave që janë kontrabandë”.
