Policia Rrugore ka vijuar me kontrollet gjatë fundjavës për parandalimin e aksidenteve me qëllim rritjen e sigurisë rrugore. Sipas njoftimit, si rezultat i monitorimit me radar, përgjatë fundjavës janë evidentuar drejtues mjetesh që abuzonin me shpejtësinë, deri në 180 km/h në Baypass-in e Fierit.
Gjatë 48 orëve të fundit, janë ndëshkuar për shpejtësi mbi normat e lejuara, 29 drejtues mjetesh, me pezullim të lejes së drejtimit nga 1 muaj deri në 6 muaj, me masa administrative nga 8.000 deri në 25.000 lekë të rinj dhe me zbitje 3 pikë nga leja e drejtimit.
Njëkohësisht, po për shpejtësi që varionte nga 150 km/h deri në 170 km/h, janë vendosur edhe 3 masa administrative 40.000 lek të rinj, pasi drejtuesit e automjeteve që u konstatuan në shkelje, ishin rezident në një shtet tjetër.
Gjithashtu, gjatë monitorimit janë ndëshkuar me masa administrative nga 2.000 deri në 4.000 lekë të rinj secili, 73 drejtues mjetesh, për shpejtësi tej normave të lejuara, por pa masën plotësuese të pezullimit të lejes së drejtimit.
Gjatë monitorimit me dron, janë ndëshkuar me masë administrative 158 drejtues mjetesh, nga këta 67 për parakalime të gabuara, 59 për përdorim të celularit gjatë drejtimit të mjetit dhe 32 për mosvendosje të rripit të sigurimit.
Policia e Shtetit apelon për të gjithë përdoruesit të zbatojnë me rigorozitet rregullat e qarkullimit rrugor.
