“ZanIN” ishte projekti që riktheu Elhaida Danin në muzikë pas disa kohësh.
Këngëtarja promovoi albumin me pesë këngë pak ditë më parë, i cili është pritur shumë mirë nga publiku. Megjithatë, krahas komenteve pozitive, këngëtarja u përball dhe me kritika.
Ka patur nga ata që e kanë krahasuar punën e këngëtares me atë të Elvana Gjatës. Kjo e fundit, solli pak kohë më parë një mini album me këngët të shoqëruara me klipe.
E ftuar në kanalin T7, Elhaida i mohoi akuzat, por e pranoi se Elvana ishte e para që solli diçka të tillë në vendin tonë.
‘’Nuk është e vërtetë, por të them të drejtën që Elvana ka qenë e para që risolli muzikën shqiptare në këtë lloj stili, në këtë lloj mënyre sa më moderne dhe e kam vlerësuar shumë sepse duhej ta bënte dikush. Elvana e bëri aq mirë sa e riktheu në modë le të themi dhe i la hapësirë artistëve tjerë për ta bërë.’’, tha Elhaida.
Elhaida Dani, njihet më tepër për pjesëmarrjen e saj në “The Voice of Italy”, ku edhe doli fituese. Ajo mahniti me zërin e saj jo vetëm shqiptarët por edhe italianët. Projekti i dytë i saj më i madh ishte “Eurovisioni”, ku ajo përfaqësoi Shqipërinë me këngën “I’m Alive” dhe u rendit e 17-ta me 34 pikë.
